Расейскія праваабаронцы: арыштаваных на акцыях супраць мабілізацыі трымаюць у нечалавечых умовах

Па словах затрыманых з Санкт-Пецярбурга, іх ні разу нармальна не пакармілі і прымусілі 50 чалавек начаваць у адным памяшканьні.

Акрамя таго, праз суткі пасьля затрыманьня яны знаходзіліся ў аўтобусах, а не ў ІЧУ.

«У аддзеле паліцыі № 3 затрыманыя начавалі шасьцёра на адной лаўцы. Сілавікі налілі ім крыху вады з-пад крана і не далі ежы, нягледзячы на абяцаньні. Затрыманым прапаноўвалі падпісаць пусты дакумэнт, а фатаграфавалі іх тройчы», — удакладняе «ОВД-Инфо».

Затрыманыя таксама расказалі, што сілавікі пагражалі зьмясьціць іх у спэцпрыёмнік у Пскове, бо ў Пецярбургу скончыліся месцы.

У невыносных умовах таксама апынуліся пратэстоўцы, якіх прывезьлі ў другі аддзел паліцыі ў Пецярбургу, адзначаюць расейскія праваабаронцы. 26 затрыманым адмовіліся даць пасьцельную бялізну і пакінулі спаць на падлозе ў вельмі брудным памяшканьні.

«Улічваючы, што замест прыбіральні — дзірка ў падлозе, каля якой лужыны мачы, што разносяцца нагамі па ўсёй падлозе памяшканьня, якая не мылася пару дзён, умовы сну на падлозе непрымальныя», — перадае словы аднаго з арыштаваных «ОВД-Инфо».

У Маскве сытуацыя аказалася не нашмат лепшай. Там арыштаваных пасьля рашэньня Галавінскага раённага суду ўжо больш за 10 гадзін трымаюць у аўтазаку каля спэцпрыёмніка Сахарава.

Навальнага пяты раз зьмясьцілі ў ШЫЗА за ягоныя выказваньні супраць мабілізацыі

Таксама сёньня стала вядома, што расейскага апазыцыйнага палітыка Аляксея Навальнага пяты раз зьмясьцілі ў ШЫЗА. Там ён правядзе 12 дзён, паведаміла ягоная прэс-сакратарка Кіра Ярмыш.

Паводле яе, адміністрацыя сказала Навальнаму, што гэтым разам яго пасадзілі ў ШЫЗА за тое, што ён «нагаварыў пра мабілізацыю на мінулым судзе».

«Не падабаецца тое, што я сказаў пра мабілізацыю, — атрымай, Навальны, 12 сутак. Зусім ніхто нават не хавае палітычнага кантэксту», — заявіў сам Навальны ў Каўроўскім судзе, дзе ён выступае сёньня па відэасувязі.

«Калі маё права выступіць супраць гэтай злачыннай мабілізацыі, празь якую дзясяткі тысяч людзей загінуць ні за што... Я пасяджу [за гэта] 12 дзён і колькі яшчэ трэба пасядзець. І вы сваім ШЫЗА рота мне не заткняце (...). Таму што тое, што адбываецца цяпер, значна страшней за 12 сутак... Пуцін крывёю зьвязвае сотні тысяч людзей мабілізацыямі і рэфэрэндумамі», — цытуе словы Навальнага «Медиазона».

У судзе Навальны аспрэчвае сваё першае зьмяшчэньне ў ШЫЗА. Упершыню яго адправілі туды 12 жніўня — за расшпілены верхні гузік на турэмнай робе. З тых часоў Навальны са са штрафнога ізалятару амаль не выходзіў.

21 верасьня прэзыдэнт Расеі Ўладзімір Пуцін абвясьціў правядзеньне ў краіне мабілізацыі і падпісаў адпаведны ўказ.

Міністар абароны Сяргей Шайгу заяўляў, што ў рамках мабілізацыі плянуецца прызваць 300 тысяч чалавек.