Прэзыдэнт Расеі Ўладзімір Пуцін на пачатку вайны адхіліў пагадненьні па Ўкраіне, якія ўключалі ў сябе адмову Кіева ад уступленьня ў NATO, паведамляе агенцтва Reuters са спасылкай на тры крыніцы, блізкія да расейскага кіраўніцтва.
Паводле дадзеных суразмоўцаў выданьня, гэтую папярэднюю ўгоду з украінскімі ўладамі падрыхтаваў намесьнік кіраўніка адміністрацыі прэзыдэнта РФ Дзьмітрый Козак. На думку чыноўніка, пагадненьне, якога ён дасягнуў з Украінай, пазбавіла б Расію ад неабходнасьці праводзіць поўнамаштабнае ўварваньне. Аднак Пуцін ясна даў зразумець, што незадаволены гэтымі саступкамі і плянуе акупаваць тэрыторыю Ўкраіны, гаворыцца ў публікацыі.
«Пасьля 24 лютага Козаку далі карт-блянш: далі яму зялёнае сьвятло. Ён атрымаў пагадненьне. Ён яго вярнуў, і яны сказалі, што ўсё трэба прыбраць. Усё было адменена. Пуцін проста зьмяніў плян па ходзе», — паведамляе адна з крыніц агенцтва.
ГЛЯДЗІЦЕ ТАКСАМА: Зяленскі прыехаў у вызвалены з расейскай акупацыі Ізюм, там зноў паднялі ўкраінскі сьцяг. ФОТАПрэс-сакратар Крамля Дзьмітрый Пяскоў адзначыў у камэнтары Reuters: «Гэта ня мае абсалютна ніякага дачыненьня да рэальнасьці. Нічога падобнага ніколі не было. Гэта абсалютна няправільная інфармацыя».
Дарадца прэзыдэнта Ўкраіны Міхаіл Падаляк заявіў, што Расея выкарыстоўвала перамовы як дымавую заслону для падрыхтоўкі да поўнамаштабнага ўварваньня, аднак не пацьвердзіў, ці было дасягнутае папярэдняе пагадненьне. «Сёньня мы дакладна разумеем, што расейскі бок ніколі ня быў зацікаўлены ў мірным урэгуляваньні», — сказаў ён.
Дзьмітрый Козак не адказаў на запыт аб камэнтары.
ГЛЯДЗІЦЕ ТАКСАМА: Пэнтагон: «Тэмпы ўкраінскага контранаступу на Харкаўшчыне сталі дзівам толькі для расейцаў»Першыя раўнды перамоваў Расеі і Ўкраіны аб урэгуляваньні канфлікту праходзілі ў вочным фармаце на беларускай тэрыторыі. Потым сустрэчы праводзіліся празь відэасувязь. Апошні раўнд сустрэч расейскай і ўкраінскай дэлегацый адбыўся ў Стамбуле 29 сакавіка. Пасьля іх РФ абвясьціла пра «кардынальнае» скарачэньне сваёй ваеннай актыўнасьці на кіеўскім і чарнігаўскім напрамках, заявіўшы, што гэта было зроблена «ў мэтах павышэньня ўзаемнага даверу».
Украінская дэлегацыя, у сваю чаргу, прадставіла ў Стамбуле свае прапановы па мірнай дамове. У ёй павінна быць прапісаная новая сыстэма гарантый бясьпекі для Ўкраіны, па аналёгіі з 5-м артыкулам статуту NATO; Украіна ня будзе разьмяшчаць на сваёй тэрыторыі замежныя вайсковыя базы і ўступаць у вайсковыя альянсы; пытаньні анэксаванага Крыму Кіеў прапануе Маскве абмяркоўваць на працягу наступных 15 гадоў.
Цяпер мірныя перамовы паміж Украінай і Расеяй не вядуцца.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.