Некалькі супрацоўнікаў Запароскай АЭС ананімна расказалі выданьню The Telegraph, што расейскія вайскоўцы пагражаюць пэрсаналу акупаванай станцыі напярэдадні візыту інспэктараў ААН і МАГАТЭ на АЭС.
Паводле словаў аднаго з суразмоўцаў выданьня, некалькіх супрацоўнікаў затрымалі дома ці па дарозе на працу, а колькасьць цывільных людзей на станцыі была зьменшаная да мінімуму.
«Наша кіраўніцтва замоўчвае гэта, каб не ствараць паніку, а людзі, якія вяртаюцца пасьля гэтых сутарэнных «гутарак», наогул нічога ня кажуць. Нядзіўна, калі падчас візыту місіі яны раптам пачнуць казаць тое, што ім загадалі, — разважае крыніца The Telegraph. — На пэрыяд візыту яны плянуюць зьвесьці да мінімуму прысутнасьць нашага пэрсаналу, а ў кожную дыспэтчарскую пасадзіць па пары сваіх прадстаўнікоў, якія будуць гучна крычаць, як яны чакалі «вызваленьня ад кіеўскага рэжыму», — папярэджвае ён.
ГЛЯДЗІЦЕ ТАКСАМА: «Енергоатом» заявіў аб рызыках уцечкі вадароду і распыленьні радыеактыўных рэчываў на Запароскай АЭСПрацаўнікі ня могуць больш праводзіць рэгулярныя вучэньні і кантраляваць дзейнае абсталяваньне станцыі, паколькі вайскоўцы забараняюць перамяшчэньне па тэрыторыі ў начны час.
«Яны ставяць сваё абсталяваньне ў машынных залях і забараняюць праход, гэта ўвесь час выклікае канфлікты паміж супрацоўнікамі і войскамі РФ, — кажа крыніца The Telegraph. — Адчуваньне, што мы ў турме строгага рэжыму: пастаянны псыхалягічны ціск, няма магчымасьці зьвязацца з сем’ямі, таму што адключылі ўсялякую сувязь, забаранілі мабільныя тэлефоны», — апісаў абстаноўку на АЭС яшчэ адзін з супрацоўнікаў станцыі.
- Запароская АЭС — найбуйнейшая атамная электрастанцыя ў Эўропе. Расейскія войскі захапілі яе неўзабаве пасьля пачатку ўварваньня ва Ўкраіну, у сакавіку 2022 году. З таго часу Кіеў і Масква неаднаразова абвінавачвалі адзін аднаго ў абстрэлах тэрыторыі побач з АЭС. На станцыі пры гэтым працягвае працаваць украінскі тэхнічны пэрсанал.
- ААН заклікала Расею і Украіну стварыць вакол станцыі дэмілітарызаваную зону. З аналягічным заклікам выступала Ўкраіна, заклік падтрымалі некалькі краінаў, у тым ліку ЗША і дзяржавы ЭЗ. Масква заяўляе, што расейскія вайскоўцы разьмешчаныя на АЭС толькі для яе аховы ва ўмовах вайны.
- Міжнароднае агенцтва атамнай энэргіі (МАГАТЭ) ужо некалькі тыдняў настойвае на адпраўцы сваёй місіі на Запароскую АЭС, адзначаючы, што з-за вайны атамная станцыя аказалася «цалкам па-за кантролем».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.