Спадарожнікавыя здымкі дазваляюць разгледзець незвычайную актыўнасьць на вайсковым аэрадроме пад Лунінцам. Вайсковы аб’ект ператварыўся ў будаўнічую пляцоўку. Тут валяць лес, расчышчаюць расьліннасьць, рэканструююць адразу некалькі будынкаў і ўзводзяць новыя, пракладаюць камунікацыі.
Перад уварваньнем ва Ўкраіну вайсковы аэрадром «Лунінец» лічыўся запасным, выкарыстоўваўся ён рэдка.
Лунінецкі вайсковы аэрадром год назад, 23 красавіка 2021 году. Спадарожнікавы здымак
Зьмены пачалі адбывацца перад вучэньнямі «Саюзная рашучасьць – 2022». Лунінецкі аэрадром, як і баранавіцкі, на іх вырашылі выкарыстоўваць у якасьці дадатковага.
21 студзеня на аэрадром прыбыў Аляксандар Лукашэнка, тады там адбылася нарада з вышэйшым вайсковым кіраўніцтвам. «Хочаш міру, рыхтуйся да вайны», — сказаў тады Лукашэнка.
Пасьля студзеня тэрыторыя аэрадрому пачала зьмяняцца.
Спадарожнікавы здымак лунінецкага вайсковага аэрадрому пасьля пачатку вайны, 11 красавіка 2022 году
Бачна, што пачалі высякаць вялікія кавалкі расьліннасьці, зносіць некаторыя пабудовы і расчышчаць тэрыторыю.
Спадарожнікавы здымак лунінецкага вайсковага аэрадрому, зроблены 7 жніўня 2022 году
Працягнулася высечка лесу і расчыстка тэрыторый, будоўля аб’ектаў. Заўважна, што вайсковай тэхнікі на аэрадроме цяпер няшмат. Мы знайшлі на тэрыторыі толькі некалькі комплексаў С-300 ці С-400. Самалётаў на пляцоўках няма, стаяць толькі два верталёты.
Вайсковы гарадок, 7 жніўня 2022 году
У вайсковым гарадку правялі рэнавацыю амаль усіх жылых ці адміністрацыйных пабудоў. На расчышчаным ад лесу кавалку зямлі пачалі ўзводзіць нешта накшталт ангару ці казармы, амаль у два разы большае за тыя, што ёсьць. Высеклі кавалак лесу каля ўязной паркоўкі.
Нашыя крыніцы паведамлялі некалькі месяцаў таму, што ў Лунінецкі райвыканкам паступіў загад пабудаваць у горадзе жытло для сем’яў расейскіх вайскоўцаў, якія будуць пражываць там стала.
Спадарожнікавы здымак тэрыторыі складу ГЗМ, 7 жніўня 2022 году
Бачым, што лес каля складу ГЗМ (гаруча-змазачных матэрыялаў) высечаны на значным кавалку. На самім складзе бачым падрыхтоўку тэрыторыі пад усталяваньне вялікіх ёмістасьцяў.
Спадарожнікавы здымак тэрыторыі каля ўсходняй часткі ўзьлётна-пасадачнай паласы, 7 жніўня 2022 году
Каля ўсходняй часткі ўзьлётна-пасадачнай паласы ўражваюць сваімі памерамі плошчы высечкі лесу і тэрыторыя распрацоўкі пад магчымае будаўніцтва. Тут зьявіліся некалькі фундамэнтаў. Па абрысах немагчыма зразумець, якога яны прызначэньня, да іх падводзяць камунікацыі. Каля самой узьлётна-пасадачнай паласы відаць вялікі намётавы лягер, ён там стаіць амаль ад пачатку вайны.
Спадарожнікавы здымак тэрыторыі каля заходняй часткі ўзьлётна-пасадачнай паласы, 7 жніўня 2022 году
Каля заходняй часткі ўзьлётна-пасадачнай паласы зноў жа вялікая тэрыторыя, расчышчаная ад лесу і расьліннасьці.
Радыё Свабода сочыць далей за разьвіцьцём сытуацыі на беларускіх вайсковых аб’ектах. Калі ў вас ёсьць інфармацыя, якой вы можаце з намі падзяліцца, дасылайце, калі ласка, у рэдакцыю.
Наш тэлеграм-бот @SvabodaBelarus_bot
Даслаць інфармацыю на наш нумар ў Signal +380502605369