Міжнародны камітэт Чырвонага Крыжа паведаміў, што не атрымаў доступу да калёніі ў Аленаўцы ад расейскіх уладаў, якія кантралююць рэгіён, напісала арганізацыя ў твітэры. Раней яна заяўляла, што гатовая падтрымаць вяртаньне і перадачу астанкаў людзей і плянуе даносіць навіны да сем’яў, якія страцілі сувязь з блізкімі ў выніку расейска-ўкраінскага канфлікту.
«Адзначым, што наша ўчорашняя просьба аб доступе да вайсковапалонных з калёніі Аленаўка не была задаволеная. Прадастаўленьне МКЧК доступу да палонных зьяўляецца абавязкам бакоў канфлікту ў адпаведнасьці з Жэнэўскімі канвэнцыямі», — напісала арганізацыя.
To be clear, our request to access the POWs from Olenivka penal facility yesterday has not been granted. Granting ICRC access to POWs is an obligation of parties to conflict under the Geneva Conventions.
— ICRC Ukraine (@ICRC_ua) July 30, 2022
Такім чынам, Расея парушыла Жэнэўскую канвэнцыю. МКЧК абяцае прасіць аб доступе да калёніі і далей. Супрацоўнікі Чырвонага Крыжа таксама хочуць праінспэктаваць, ці атрымліваюць параненыя палонныя належную дапамогу.
У калёніі ў Аленаўцы 29 ліпеня загінулі прынамсі 53 украінскія вайскоўцы, якія ўтрымліваліся ў палоне.
Расея і прарасейскія сэпаратысты ў Данецку заяўляюць, што ўдар па калёніі быў нанесены ўкраінскім войскам. Масква называе тое, што здарылася, ваенным злачынствам, учыненым Украінай. Кіеў гэта адмаўляе і заяўляе, што атаку ўчыніла Расея.
ГЛЯДЗІЦЕ ТАКСАМА: На Данбасе заявілі пра гібель 53 украінскіх палонных ад артылерыйскага ўдару. У Кіеве гэта назвалі «чарговай Катыньню» з боку Расеі ГЛЯДЗІЦЕ ТАКСАМА: Кіеў заклікаў сьвет прызнаць Расею дзяржавай-тэрарысткай пасьля масавага забойства палонных украінцаў