Журналісту Intex-press Ганцарэвічу прысудзілі 2,5 года зьняволеньня за фота расейскай вайсковай тэхнікі

13 ліпеня Берасьцейскі абласны суд пачаў разгляд крымінальнай справы палітзьняволенага Юрыя Ганцарэвіча.

Прадстаўнік дзяржаўнага абвінавачаньня папрасіў пакараць журналіста 2,5 года калёніі. Паводле выданьня Intex-press, Дзяржабвінаваўца сказаў, што Ганцарэвіч, «маючы намер на садзейнічаньне экстрэмісцкай дзейнасьці, адправіў у бот тэлеграм-канала Радыё Свабода фотавыявы вайсковай авіятэхнікі, якая знаходзіцца на тэрыторыі аэрадрома 61-й зьнішчальнай авіяцыйнай базы, якая дысьлякуецца ў Баранавічах».

Сваю віну Ганцарэвіч у судзе прызнаў цалкам. На пытаньне, навошта ён зрабіў гэта, абвінавачаны патлумачыў, што «хацеў паказаць, што ў бок Украіны лятаюць не беларускія самалёты, а расейскія; хацеў даказаць, што Беларусь ня ўдзельнічае ў ваенных дзеяньнях».

У выніку 14 ліпеня судзьдзя Мікалай Грыгаровіч абвінаваціў журналіста ў садзейнічаньні экстрэмісцкай дзейнасьці і пакараў яго 2 гадамі 6 месяцамі зьняволеньня, паведамляе Intex-press.

Журналіста Intex-press Юрыя Ганцарэвіча затрымалі 27 красавіка. Пасьля выстаўленьня абвінавачаньня паводле арт. 361-4 КК («Садзейнічаньне экстрэмісцкай дзейнасьці») яго перавялі ў Баранавіцкае СІЗА № 6.

Праз тыдзень пасьля затрыманьня Ганцарэвіча праўладныя прапагандысцкія каналы распаўсюдзілі відэа ягонага допыту і паведамілі, што маладога чалавека затрымалі за тое, што нібыта фатаграфаваў расейскую вайсковую тэхніку і дасылаў фатаздымкі ў незалежныя мэдыя Zerkalo.io і Радыё Свабода.

Паколькі раней улады прызналі вядучыя беларускія незалежныя мэдыя «экстрэмісцкімі фармаваньнямі» (выданьне Zerkalo.io, у адрозьненьне ад Радыё Свабода, ня мае такога статусу), цяпер журналіста абвінавацілі менавіта ў садзейнічаньні такому «фармаваньню».