«Нашы штурмавікі нанесьлі тры авіяўдары па складах боепрыпасаў у Мікалаеўскай вобласьці, у раёнах Сьнягураўкі і Любімаўкі. А зь верталётаў — па апорным пункце праціўніка ў раёне Праўдыні і варожых пазыцыях вакол Аляксандраўкі», — паведаміла ўвечары 11 ліпеня апэратыўнае камандаваньне «Поўдзень».
Таксама, паводле камандаваньня, у выніку абстрэлу ўкраінскіх ракетна-артылерыйскіх падразьдзяленьняў расейскае войска страціла склад з боепрыпасамі ў Новай Кахоўцы Херсонскай вобласьці.
У сацыяльных сетках апублікавалі відэа з магутным выбухам.
Расейскія агенцтвы ТАСС і «РИА Новости» заяўляюць, што пад абстрэл у Новай Кахоўцы трапілі склады з салетрай і што пашкоджаныя найбліжэйшыя рынак, бальніца і жылыя дамы, загінулі 6 чалавек, яшчэ каля 40 паранены.
- Горад Новая Кахоўка — раённы цэнтар у Херсонскай вобласьці — перайшоў пад кантроль Расеі ў першы ж дзень яе маштабнага нападу на Ўкріану, 24 лютага 2022. Раней у адкрытых крыніцах не было інфармацыі пра тое, што там ёсьць склады з салетрай.