Палітзьняволенаму Анджэю Пачобуту не перадаюць лісты ад сына, бо яны на польскай мове

Адміністрацыя менскага сьледчага ізалятара № 1 на вуліцы Валадарскага, куды на пачатку траўня перавялі Пачобута, не перадае яму лісты ад сваякоў, паведамляе «Польскае Радыё» са спасылкай на Gazeta Wyborcza.

Паводле жонкі Анджэя Аксаны Пачобут, цэнзуру не праходзяць перш за ўсё лісты ад Ярэка — 12-гадовага сына журналіста, які піша бацьку на польскай мове.

«Ён не прайшоў цэнзуру» — з такой інфармацыяй вярнуўся ліст, у якім сын апісаў канец навучальнага году.

Аксана Пачобут падкрэсьліла, што лісты, якія Пачобут пісаў сыну, таксама зазнавалі бязьлітасную цэнзуру ў турме.

«Яму вярнулі тры лісты, напісаныя па-польску Ярэку. Відаць, так яму паказваюць, як у Беларусі змагаюцца з палякамі, нават калі яны сядзяць у турме», — напісала яна ў Фэйсбуку.

Цяпер, паводле жонкі Пачобута, Анджэй чакае суду і пераводу ў калёнію. «Ён падазрае, што яго вяртаньне ў СІЗА зьвязана з завяршальным этапам расьсьледаваньня», — кажа Аксана Пачобут.

Паводле афіцыйнай інфармацыі, сьледзтва ў дачыненьні да Анджэя Пачобута працягнецца яшчэ месяц і скончыцца 25 ліпеня. Аднак за апошні год яно ўжо некалькі разоў прадаўжалася.

Журналіст Анджэй Пачобут, прадстаўнік незалежнага Саюзу палякаў у Беларусі, быў арыштаваны 25 сакавіка 2021 году. Беларускія ўлады абвінавачваюць яго ў «распальваньні нацыянальнай варожасьці » і «рэабілітацыі нацызму». Такія ж абвінавачаньні былі выстаўленыя яшчэ чатыром актывістам Саюзу палякаў, у тым ліку старшыні арганізацыі Анжаліцы Борыс. Усім ім пагражае да 12 гадоў пазбаўленьня волі. Зь пяці абвінавачаных па «справе палякаў», сёньня за кратамі застаецца толькі Анджэй Пачобут.