Фядута рыхтуецца да суду
Паліттэхноляг і доктар філялёгіі Аляксандар Фядута ўжо 14 месяцаў знаходзіцца за кратамі. Нядаўна яго зь СІЗА КДБ перавялі ў менскі сьледчы ізалятар № 1 на вуліцы Валадарскага. Ён рыхтуецца да суду.
Жонка Фядуты Марына Шыбко паведаміла, што на «Валадарцы» яе муж «засяліўся ў сваю былую камэру».
«Сустрэў старых знаёмых і пачаў карэктаваць замаўленьне кніг, па згодзе сукамэрнікаў (бо кінуліся вывучаць нямецкую мову). Абмяняліся навінамі, (тэлевізара ў „Амэрыканцы“ не было), — напісала ў фэйсбуку Марына Шыбко, — Працягне працу па Бальзаку (п’еса па „Отцу Горио“), вызначыўся, чым будзе займацца ў калёніі (аб гэтым потым, няхай заедзе). Распавёў, што часта бачыць у сьне Гародню, бабціну хату, табачку і школу, дзе вучыўся і дзе працаваў. І, вядома, Нёман і мост, па якім шпацыраваў».
Таксама Марына Шыбко зазначыла, што Аляксандар напісаў першы з часоў школы верш па-беларуску. Аднак яго жанчына не працытавала, бо, па яе словах, верш «асабісты».
«Вось урывак зь верша, прысьвечаны Караткевічу:
Быў. Есьць. Буду:
Он жил, и в нём идея жила,
И, конечно, не только в нём.
Одного он в этом мире желал —
Победы добра над злом.
Он смеялся, не ведая грусть,
В его мире зло оставалось злом,
А добром была Беларусь.
Усім дзякуе за лісты, якія атрымаў у „Амэрыканцы“, усім прывітаньне, напісаў, што ўсім адказаў», — напісала Марына Шыбко.
Супрацоўнікі КДБ затрымалі Аляксандру Фядуту 12 красавіка ў Маскве. Разам зь Юрыем Зянковічам і Рыгорам Кастусёвым ён зьяўляецца фігурантам крымінальнай справы аб «змове з мэтай захопу ўлады неканстытуцыйным шляхам» (арт. 357 Крымінальнага кодэксу). За кратамі палітвязьня ўтрымліваюць ужо больш за год.
У сярэдзіне сьнежня ў Фядуты дыягнаставалі вострую сардэчную недастатковасьць, а праз тры дні ў яго здарыўся прыступ стэнакардыі і арытміі, таксама ён хварэў на пнэўманію.
ГЛЯДЗІЦЕ ТАКСАМА: Справу Зяньковіча, Кастусёва і Фядуты перадалі ў суд. Ім пагражае да 12 год турмы