Прэзыдэнт Нямеччыны заклікае да перамоваў і гаворыць пра голад
Прэзыдэнт Нямеччыны Франк-Вальтэр Штайнмаер заклікаў Уладзіміра Пуціна пайсьці на прамыя перамовы з Уладзімірам Зяленскім і спыніць баявыя дзеяньні ва Ўкраіне, піша Deutsche Welle.
«Праявіце павагу да сувэрэнітэту Ўкраіны, перапыніце баявыя дзеяньні. Спадар Пуцін, перапыніце пакуты і руйнаваньні ва Ўкраіне! Выведзіце свае войскі! І не адмаўляйцеся ад прамых і сур’ёзных перамоваў з прэзыдэнтам Зяленскім!»
Таксама нямецкі прэзыдэнт зьвярнуў увагу на тое, што «агрэсіўная вайна Пуціна закранае ня толькі людзей ва Ўкраіне». У прыватнасьці, праз тое, што Расея блякуе ў беларускіх партах экспарт мільёнаў тон збожжа, сусьветныя цэны на яго рэзка ўзрасьлі.
«Многім рэгіёнам сьвету ў наступнымі месяцы пагражаюць голад і сьмерць, асабліва ва Ўсходняй і Паўднёвай Афрыцы».
ГЛЯДЗІЦЕ ТАКСАМА: Reuters: Нямеччына і Італія дазволілі сваім кампаніям адкрываць рахункі ў рублях для пакупкі расейскага газуДзяржаўны дэпартамэнт ЗША супраць спробы расейцаў зрабіць «пастановачны рэфэрэндум»
Дзяржаўны дэпартамэнт ЗША асудзіў дзеяньні Расеі на тэрыторыях Украіны, якія знаходзяцца пад кантролем расейскіх войскаў.
«Мы бачылі, як расейскія войскі гвалтоўна везьлі людзей з акупаванай тэрыторыі. Мы бачылі, як расейскія войскі перавозілі ўкраінцаў у так званыя фільтрацыйныя лягеры. Мы бачылі спробы расейскіх войскаў іншымі спосабамі пакарыць украінскі народ на гэтых тэрыторыях», — сказаў прадстаўнік Дзяржаўнага дэпартамэнту Нэд Прайс.
25 траўня прэзыдэнт Расеі Ўладзімір Пуцін падпісаў указ аб спрошчаным парадку выдачы расейскага грамадзянства жыхарам Запароскай і Херсонскай абласьцей Украіны.
Прайс параўнаў гэтыя дзеяньні з папярэднімі спробамі Расеі «сфабрыкаваць пастановачныя рэфэрэндумы, закліканыя надаць выгляд легітымнасьці расейскаму праўленьню над часткамі тэрыторый Украіны».
ГЛЯДЗІЦЕ ТАКСАМА: ЗША зоймуцца зборам і аналізам доказаў ваенных злачынстваў Расеі ва ЎкраінеМЗС Вялікай Брытаніі: на расейскую агрэсію неабходна адказваць сілай
Міністарка замежных спраў Вялікай Брытаніі Ліз Трас лічыць небясьпечнымі спробы «залагодзіць» расейскага лідэра.
«Расейскую агрэсію нельга залагодзіць. На яе неабходна адказваць сілай. Мы павінны быць непахіснымі ў забесьпячэньні перамогі Ўкраіны вайсковай дапамогай і санкцыямі. Цяпер мы ўжо ня можам прыбраць нагу з пэдалі газу», — заявіла Ліз Трас.
Трас адправілася зь візытам у Босьнію і Герцагавіну, дзе зьбіраецца запатрабаваць павелічэньня паставак зброі Ўкраіне і ўзмацненьня жорсткасьці санкцый супраць Расеі.
Гаворачы аб «супакаеньні агрэсара», Трас зрабіла відавочную адсылку да палітыкі, якую ў канцы 30-х гадоў ХХ стагодзьдзя вёў урад Брытаніі на чале з Нэвілам Чэмбэрленам у адносінах нацысцкай Нямеччыны. Яна заключалася ў саступках, кампрамісах і патураньні яе агрэсіі. Такая палітыка прывяла толькі да канчатковай дэградацыі Вэрсальскай сыстэмы, Лігі Нацый і сыстэмы калектыўнай бясьпекі, радыкальнага зьмяненьня балянсу сіл у Эўропе, паслабленьня геапалітычных пазыцый Вялікай Брытаніі і Францыі і ўзмацненьня Нямеччыны.
На думку Трас, зараз нельга дапусьціць ніякага адкочваньня ад мэты, каб гарантаваць паразу Расеі ў яе вайне супраць Украіны.
«Мы не павінны дазволіць, каб ва Ўкраіне разьвіўся зацяжны і ўсё больш пакутлівы канфлікт».
Захаду, паводле яе, трэба зрабіць высновы зь нядаўняй гісторыі, калі Пуцін, дамогшыся ад Захаду розных саступак, нападаў на Грузію і часткі Ўкраіны Крым і Данбас.
ГЛЯДЗІЦЕ ТАКСАМА: МЗС Брытаніі: расейская «фабрыка троляў» распаўсюджвае дэзінфармацыю пра ЎкраінуЭстонія за адмову ад «дрэннага міру»
Прэм’ер-міністарка Эстоніі Кая Калас, якая перасьцерагла калег ад дэманстрацыі Пуціну якой-небудзь слабасьці.
«Мір, заключаны на дрэнных умовах для Ўкраіны, будзе азначаць дрэнны мір для ўсіх нас. Значна небясьпечней саступаць Пуціну, чым правакаваць яго. Усе гэтыя, здавалася б, дробныя саступкі агрэсару вядуць да вялікіх войнаў», — заявіла Калас.
Раней стала вядома, што Італія распрацавала мірны плян для Расеі і Ўкраіны з шырокай аўтаноміяй Крыму і Данбасу. Дакумэнт прадугледжвае, што рэгіёны змогуць устанавіць свае моўныя і культурныя правы, свабоднае перасоўваньне тавараў, паслуг і людзей паміж краінамі і аўтаномна кіраваць сваёй бясьпекай. Ва Ўкраіне гэтыя прапановы ніяк не камэнтавалі.
ГЛЯДЗІЦЕ ТАКСАМА: Італія распрацавала мірны плян для Расеі і Ўкраіны з шырокай аўтаноміяй Крыму і ДанбасуВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.