Італія распрацавала мірны плян для Расеі і Ўкраіны з шырокай аўтаноміяй Крыму і Данбасу

Матэрыял аб гэтым апублікавала газэта la Repubblica.

Як піша выданьне, плян падрыхтаваны Міністэрствам замежных спраў Італіі ў супрацоўніцтве з офісам прэм’ер-міністра Італіі і прадстаўлены генэральнаму сакратару ААН, краінам G7 і групе «Квінт» (акрамя Італіі, туды ўваходзяць Францыя, Нямеччына, Вялікая Брытанія і ЗША). З тэксту la Repubblica вынікае, што ініцыятарам стварэньня дакумэнту мог стаць міністар замежных спраў Люіджы Ды Маё.

Плян прадугледжвае чатыры этапы.

• Спыненьне агню і дэмілітарызацыя лініі фронту са стварэньнем мэханізмаў назіраньня.
• Шматбаковыя перамовы аб будучыні Ўкраіны, з абмеркаваньнем магчымасьці зрабіць краіну нэўтральнай пры міжнародных гарантыях і падрыхтоўцы да ўступленьня яе ў ЭЗ.
• Стварэньне поўнай аўтаноміі Крыму і Данбасу пры прызнаньні Масквой гэтых тэрыторыяў часткай Украіны. Аднак дакумэнт прадугледжвае, што рэгіёны змогуць устанавіць свае моўныя і культурныя правы, свабоднае перасоўваньне тавараў, паслуг і людзей паміж краінамі і аўтаномна кіраваць сваёй бясьпекай.
• Стварэньне новага шматбаковага пагадненьня аб бясьпецы ў Эўропе і вывад расейскіх войскаў, прынамсі да сытуацыі 23 лютага 2022 году, калі афіцыйна іх не было ў Данбасе.

Рэалізоўваць пагадненьне, згодна з італьянскім плянам, павінна міжнародная група садзейнічаньня, у супрацоўніцтве ААН, «Квінта», Эўразьвязу, Турэччыны, Кітаю, Канады і Ізраілю.

• Газэта не паведамляе, ці былі прапановы перададзеныя Ўкраіне і Расеі. Абедзьве краіны прызналі, што перамовы паміж імі фактычна спыніліся. Кіеў дакумэнт не камэнтаваў.
• Яго палажэньні прадугледжваюць зьмены Канстытуцыі Ўкраіны, раней прэзыдэнт Уладзімір Зяленскі заяўляў, што рэфэрэндум у краіне па ўмовах міру немагчымы бяз вываду расейскіх войскаў.
• Прэсавы сакратар Крамля Дзьмітры Пяскоў заявіў на брыфінгу 19 траўня, што ў Расеі пра дакумэнт даведаліся з друку і не гатовыя зьмястоўна яго камэнтаваць.