Пра гэта інфармуе DW.
Міністар фінансаў Нямеччыны Крыстыян Лінднэр гатовы да абмеркаваньня прапаноў аб канфіскацыі актываў Банку Расеі ў замежнай валюце і накіраваньні гэтых сродкаў на аднаўленьне Ўкраіны.
«У палітычным сэнсе я адкрыты да ідэі канфіскаваць замежныя актывы расейскага Цэнтральнага банку. Мы ўжо вядзём гэтыя дыскусіі ў G7 і ЭЗ і абмяркоўваем прапановы», — заявіў ён у інтэрвію нямецкай газэце Handelsblatt, францускай Les Échos, гішпанскай El Mundo і італьянскай Corriere della , якое апублікавана ў аўторак, 17 траўня.
Паводле словаў Лінднэра, у выпадку з замарожанымі актывамі расейскіх фізычных асоб неабходна вывучыць магчымасьці, дазволеныя заканадаўствам. «Мы павінны паважаць вяршэнства закону, нават калі мы маем справу з расейскімі алігархамі», — падкрэсьліў ён у інтэрвію перад пачаткам сустрэчы міністраў фінансаў «Вялікай сямёркі» пад яго старшынствам.
Нямецкі міністар таксама адзначыў, што краіны G7 «стаяць плячо ў плячо з Украінай і гатовыя прыняць рашэньне аб далейшых санкцыях», ізалюючы Расею «палітычна, фінансава і эканамічна».
«У той жа час у сувязі з ростам працэнтных ставак і сусьветных цэн на аграрную прадукцыю мы назіраем значныя эканамічныя наступствы, асабліва для краін зь нізкімі даходамі. Нам давядзецца сумесна працаваць над стабілізацыяй сусьветнай эканомікі», — прызнаў ён.
Адначасова Лінднэр падкрэсьліў, што да такіх эканамічных наступстваў прывяла вайна, а не заходнія санкцыі.
Кіраўнік Мінфіну Нямеччыны прызнаў памылкі папярэдніх урадаў
Адказваючы на пытаньне аб мэтазгоднасьці штрафных захадаў і адсутнасьці ў цяперашні час адчувальнага эфэкту ад іх увядзеньня, кіраўнік Мінфіну Нямеччыны выказаў упэўненасьць, што з часам санкцыі будуць усё больш абцяжарваць расейскую эканоміку, а прэзыдэнт РФ Уладзімір Пуцін павінен «заплаціць вельмі высокую цану за агрэсію супраць Украіны».
Акрамя таго, Лінднэр прызнаў памылку папярэдніх урадаў Нямеччыны ў выстройваньні энэргетычнай стратэгіі краіны і дапушчэньні занадта высокай залежнасьці ад паставак расейскіх энэрганосьбітаў.
«Цяпер нам трэба будзе вельмі шмат працаваць над дывэрсыфікацыяй імпарту энэрганосьбітаў. Ужо цяпер магчымае забесьпячэньне нашай эканомікі вугалем зь іншых крыніц. Мы таксама гатовыя адмовіцца ад нафты, але з прыродным газам гэта зойме больш часу», — сказаў ён
Лінднэр: санкцыі не павінны нанесьці Захаду большай шкоды, чым Расеі
Адначасова Лінднэр заклікаў пазьбегнуць сытуацыі, у якой заходнія краіны сваімі санкцыямі нанясуць сабе больш шкоды, чым вайсковаму бюджэту прэзыдэнта РФ Уладзіміра Пуціна. «Эканамічная моц ЭЗ і групы лібэральных дэмакратый G7 зьяўляецца нашай перавагай у гэтым канфлікце. Неадкладнае спыненьне паставак газу з Расеі нанесла б сур’ёзную шкоду эканоміцы Нямеччыны», — адзначыў ён. Палітык растлумачыў, што ня хоча ісьці на рызыку сур’ёзнага эканамічнага спаду, які б абмежаваў магчымасьці Бэрліну падтрымліваць Кіеў у эканамічных і вайсковых адносінах.
Сустрэча міністраў фінансаў «Вялікай сямёркі», у якой цяпер старшынюе Нямеччына, адбудзецца ў Боне і Кёнігсьвінтары 18-20 траўня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.