TikTok выдаліў акаўнт дзяржаўнай газэты «Мінская праўда» з 40 тысячамі падпісчыкаў

Пра выдаленьне свайго акаўнту з TikTok выданьне паведаміла ў тэлеграм-канале.

Рэдакцыя «Мінскай праўды» адзначыла, што на працягу доўгага часу на старонку былі арганізаваны атакі з-за мяжы для яе блякаваньня.

Летась у пачатку верасьня дзяржаўная газэта «Мінская праўда» разьмясьціла на вокладцы карыкатуру з падзагалоўкам «Мутацыя веры», на якой былі каталіцкія сьвятары з крыжамі ў форме свастыкі.

Беларускія сьвятары выступілі з рэзкай крытыкай публікацыі і выказалі надзею, што адпаведныя органы дзяржаўнай улады «дадуць належную прававую ацэнку гэтай карыкатуры і публікацыі ў газэце».

Пазьней МУС Беларусі даслаў адказ па выніках праверкі на калектыўны запыт наконт гэтай публікацыі, які падпісаў першы намесьнік начальніка УУС Менскага аблвыканкаму Віталь Казлоў.

У ім зазначалася, што з боку УП «Інфармацыйнае агенцтва „Мінская праўда“ парушэньняў дзейнага заканадаўства не ўстаноўлена».

Беларусы склалі на партале «Зручны горад» пэтыцыю, дзе запатрабавалі заклікаць да адказнасьці датычных службовых асобаў рэдакцыі газэты «Мінская праўда».