Даўжыня траншэй перавышае 200 мэтраў, паведамляе праграма «Схемы» ўкраінскай службы Радыё Свабода.
Першыя раскапаныя траншэі на могілках зьявіліся 24 сакавіка, пасьля акупацыі вёскі расейскімі вайскоўцамі. На спадарожнікавым здымку Planet відаць, што іх даўжыня 60–70 мэтраў.
Спадарожнікавы здымак Planet масавага пахаваньня ў вёсцы Стары Крым пад Марыюпалем 24 сакавіка 2022
На спадарожнікавым здымку ад 7 красавіка відаць, што за два тыдні адбыліся прыкметныя зьмены: месца пахаваньня павялічылася. Частка акопаў засыпаная.
Спадарожнікавы здымак Planet масавага пахаваньня ў вёсцы Стары Крым пад Марыюпалем 7 красавіка 2022
На спадарожнікавым здымку за 24 красавіка зафіксаваныя новыя траншэі. Даўжыня брацкай магілы павялічылася больш як да 200 мэтраў.
Параўнаньне спадарожнікавых здымкаў Planet за 24 сакавіка і 24 красавіка 2022 году масавага пахаваньня ў вёсцы Стары Крым пад Марыюпалем
Мэр Марыюпалю Вадзім Бойчанка заявіў, што ўладам вядома, што расейскія вайскоўцы вывозяць целы загінулых марыюпальцаў на могілкі ў Стары Крым на месцы масавых пахаваньняў.
«Мы ведаем пра гэтыя брацкія магілы, таму што гэтыя фашысты — а ў мяне няма іншых словаў — за ежу прыцягваюць мясцовае насельніцтва да пахаваньня. Кажуць, што трэба працаваць „па гадзінах“, каб далі ежу і ваду... Цяпер у Марыюпалі не хапае „гуманітаркі“, якую яны імпартуюць, таму людзі вымушаныя гэта рабіць», — сказаў Вадзім Бойчанка.
ГЛЯДЗІЦЕ ТАКСАМА: Расея паабяцала «калідор» на «Азоўсталі» для цывільных асоб. Кіеў: «Дамоўленасьцяў па гуманітарных калідорах з „Азоўсталі“ сёньня няма».Вёска Стары Крым з 10 сакавіка знаходзіцца пад акупацыяй расейскіх войскаў. Адлегласьць ад Марыюпалю — 5 кілямэтраў.
Раней «Схемы» паведамлялі, што спадарожнік зафіксаваў дзьве брацкія магілы пад Марыюпалем: у Мангушах на захад ад гораду і ў вёсцы Вінаграднае — на ўсходзе.
Марыюпаль быў акружаны расейскімі войскамі ў першыя дні маштабнага расейскага ўварваньня, якое пачалося 24 лютага.