«6 сакавіка здарылася самая страшная гісторыя, якая толькі магла з намі адбыцца. Раней вораг хадзіў вакол нашай тэрыторыі — ставілі міны вакол нас. Мы назіралі, як яны рыюць акопы. А 6 сакавіка да нас зайшоў кадыраўскі полк. Выламалі вароты, заехала тэхніка, чалавек восемдзесят вайскоўцаў. Усіх нас вывелі, вынесьлі нават тых, хто хадзіць ня можа. Сказалі: «Дырэктара сюды», — расказала Марына Ганіцкая ў інтэрвію выданьню Мeduza.io.
Разваліны ў Барадзянцы, 6 красавіка
Паводле яе, вайсковец прадставіўся Даніілам Мартынавым, палкоўнікам расейскай арміі (так завуць намесьніка кіраўніка Расгвардыі па Чачэнскай Рэспубліцы, які ваюе цяпер ва Ўкраіне. — РС).
«Ён сказаў, што калі будзем добра сябе паводзіць, то будзем жывыя, ня будуць нас забіваць, не прычыняць нам болю і больш ніводнае шкло ня выпадзе з нашых вокнаў. Сказаў, што яны прыйшлі ад нацысцкай улады нас вызваляць, хочуць спаліць наш урад. Сказаў: „Мы зараз запішам кароценькае відэа, вы нам падзякуеце і будзеце вольныя, будзеце пад абаронай расейскага прэзыдэнта Ўладзіміра Пуціна“», — дадала яна.
І калі запытала ў яго, за што дзякаваць, той нахіліўся да яе твару, паглядзеў у вочы і сказаў: „За тое, што вы жывыя“.
„Гэта было страшна. Ён на мяне не крычаў, не. Сказаў, што ён за дзьве хвіліны можа нас усіх узарваць, але калі відэа запішам, усё будзе добра. Тады я зразумела, што жывой не вярнуся, зразумела, што яны прыйшлі запісаць відэа і проста забіць нас усіх“, — кажа Марына Ганіцкая.
Паводле яе, салдат уключыў камэру, а палкоўнік пачаў гаварыць: „Я — Данііл Мартынаў, палкоўнік расейскай арміі. Мы прыйшлі вызваліць вас ад нацысцкай улады. Цяпер вы зможаце свабодна хадзіць на мітынгі 9 траўня, насіць георгіеўскую стужку“. Тыя, што стаялі насупраць мяне, за камэрай, нацэлілі зброю на мяне і іншых людзей. А тыя вайскоўцы, якія сярод людзей былі, за маёй сьпінай, стаялі і ўсьміхаліся».
Барадзянка, 8 красавіка
Праз тыдзень дырэктарку інтэрнату разам з пацыентамі эвакуавалі ў Жытомір, але яна спадзяецца аднавіць інтэрнат і вярнуцца.
У размове з журналістамі Марына Ганіцкая прызналася, што ёй цяпер сорамна за тое, што яна вучыла школьнікаў пра братнія народы Расеі і Ўкраіны.
«Мы не браты і ня сёстры. Гэта нашы ворагі, мы не прабачым іх за тое, што яны забілі нашых сыноў і гвалтавалі дзяўчатак. Да вайны ў мяне былі доўгія сьветлыя валасы, ніжэй за пояс. Пасьля таго як мы выйшлі з палону, мне хацелася пазбавіцца ад усяго, да чаго дакраналіся гэтыя людзі. І я адрэзала валасы», — расказала Марына Ганіцкая.
2 красавіка Кіеўскую вобласьць вызвалілі ад расейскіх войскаў. Пасьля адступленьня вайскоўцаў Расеі ў вызваленых гарадах і вёсках былі зафіксаваныя факты масавых забойстваў цывільных.
ГЛЯДЗІЦЕ ТАКСАМА: У Барадзянцы пад Кіевам працягваюць разьбіраць завалы і даставаць целы. ФОТАУкраіна і прадстаўнікі Захаду патрабуюць прыцягнуць Расею да адказнасьці за ваенныя злачынствы праз тое, што адбылося ў Кіеўскай вобласьці. Крэмль «абвяргае любыя абвінавачаньні ў забойствах мірных жыхароў», нават нягледзячы на тое, што факты забойстваў цывільных у пэрыяд расейскай акупацыі былі пацьверджаныя спадарожнікавымі здымкамі.
ГЛЯДЗІЦЕ ТАКСАМА: «Яму расейскі БМП пераехаў галаву». У Барадзянцы на Кіеўшчыне ўскрываюць пахаваньні забітых падчас акупацыіВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.