У Міністэрстве замежных спраў Украіны адрэагавалі на заяву прэзыдэнта Францыі Эманюэля Макрона, які адмовіўся назваць дзеяньні Расеі супраць Украіны «генацыдам» і заявіў, што ўкраінскі і расейскі народы — «браты».
«Нежаданьне прэзыдэнта Францыі Эманюэля Макрона прызнаць генацыд украінцаў пасьля ўсіх адкрытых заяваў расейскага кіраўніцтва і злачынных дзеяньняў расейскіх вайскоўцаў расчароўвае. Украіна і Расея гістарычна блізкія з аб’ектыўных прычын, але міт аб двух братэрскіх народах Расеі і Ўкраіны пачаў разбурацца пасьля акупацыі Крыму і агрэсіі на Данбасе ў 2014 годзе. Тады рускія „браты“ нібыта прыйшлі бараніць расейскамоўнае насельніцтва. Але за восем гадоў забілі 14 тысяч украінцаў. Гэты міт канчаткова разбурыўся, калі першыя расейскія ракеты паляцелі на ўкраінскія гарады ў лютым», — гаворыцца ў камэнтары Алега Нікаленкі.
Прадстаўнік украінскага замежнапалітычнага ведамства дадаў: «„Братэрскі“ народ не забівае дзяцей, не расстрэльвае цывільных, не гвалтуе жанчын, не калечыць пажылых людзей і не зьнішчае дамы іншага „братэрскага“ народу. Да зьверстваў супраць безабаронных людзей не зьвяртаюцца нават самыя разьюшаныя ворагі. Пакуль няма ні маральных, ні рэальных падстаў весьці размовы пра „братэрскія“ сувязі расейскага і ўкраінскага народаў».
ГЛЯДЗІЦЕ ТАКСАМА: Макрон: Дзеяньні Расеі не «генацыд», расейцы і ўкраінцы — «браты»Напярэдадні прэзыдэнт Францыі Эманюэль Макрон адмовіўся называць дзеяньні Расеі ў вайне супраць Украіны «генацыдам» і заявіў, што расейцы і ўкраінцы — браты.
Адказваючы на пытаньне ў інтэрвію France 2, ці будзе ён, як і прэзыдэнт ЗША Джо Байдэн, выкарыстоўваць тэрмін «генацыд» для апісаньня забойства ўкраінцаў расейскімі вайскоўцамі, Макрон сказаў: «Я буду насьцярожана ставіцца да такіх тэрмінаў сёньня, таму што гэтыя два народы (расейцы і ўкраінцы. — РС) — браты. Я хачу працягваць старацца як мага больш спыніць гэтую вайну і аднавіць мір. Я ня ўпэўнены, што эскаляцыя рыторыкі служыць гэтай мэце. Што мы можам з упэўненасьцю сказаць, — што сытуацыя непрымальная і што гэта ваеннае злачынства. Мы перажываем ваенныя злачынствы, беспрэцэдэнтныя на нашай зямлі, на нашай эўрапейскай зямлі», — сказаў Макрон.
ГЛЯДЗІЦЕ ТАКСАМА: Галоўнае ўпраўленьне выведкі Ўкраіны: кіраўніцтва Расеі загадала зьнішчыць любыя доказы злачынстваў сваёй арміі ва ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.