Агенцтва «Франс прэс» цытуе яго словы, сказаныя ў эфіры амэрыканскага тэлеканалу CBS.
«Гэта генацыд. Ліквідацыя ўсёй нацыі і народу. Мы грамадзяне Ўкраіны. У нас больш за 100 нацыянальнасьцяў. Гаворка ідзе пра зьнішчэньне ўсіх гэтых нацыянальнасьцяў», — сказаў Зяленскі.
«Мы грамадзяне Ўкраіны і не жадаем падпарадкоўвацца палітыцы Расейскай Фэдэрацыі. Вось чаму нас зьнішчаюць», — сказаў Зяленскі ў эфіры CBS.
«Гэта катаваньне ўсяго народу», — дадаў ён.
ГЛЯДЗІЦЕ ТАКСАМА: Рэакцыя сьвету на масавыя забойствы ў Бучы: Кулеба лічыць Расею горшай за ісламістаў, Ціханоўская заклікае зьбіраць доказы злачынстваўУ той жа час Зяленскі падкрэсьліў, што ў яго не было іншага выбару, акрамя як адкласьці свае асабістыя пачуцьці гневу і агіды і працягваць мірны дыялёг з прэзыдэнтам Расеі Ўладзімірам Пуціным.
«Цяжка сказаць, як пасьля ўсяго зробленага мы можам весьці якія-небудзь перамовы з Расеяй. Гэта на асабістым узроўні, але як прэзыдэнт я павінен гэта рабіць», — сказаў ён.
ГЛЯДЗІЦЕ ТАКСАМА: Расея на перамовах пагадзілася на рэфэрэндум ва Ўкраіне, — сябра ўкраінскай дэлегацыіАднак любыя перамовы будуць залежаць ад спыненьня агню.
«Я нават не магу сустрэцца, калі ідуць абстрэлы. Таму спачатку спыненьне агню. Потым мы можам сустрэцца з прэзыдэнтам Расеі», — сказаў Зяленскі.
«У той момант, калі прыйдзе канец вайне, і пасьля таго, як мы разам абмяркуем гарантыі бясьпекі і нэўтральны пазаблокавы статус, але пры захаваньні нашага сувэрэнітэту — моцная армія», — сказаў прэзыдэнт.
У нядзелю дзяржсакратар ЗША Энтані Блінкен заявіў, што Вашынгтон працягне падтрымліваць Украіну, але не прапанаваў гарантыяў бясьпекі.
ГЛЯДЗІЦЕ ТАКСАМА: Белы дом заявіў, што не гатовы прымаць рашэньняў аб гарантыях бясьпекі ЎкраінеЗяленскі сказаў, што яго краіна ўдзячная за падтрымку ЗША, але што да гарантыяў, то «мы іх яшчэ ні ад каго не атрымлівалі».
Ён сказаў, што ня можа зразумець, як прыцягнуць да адказнасьці вінаватых у забойствах цывільнага насельніцтва.
«Я ня ведаю, які закон і які тэрмін зьняволеньня будзе адэкватны для гэтага. Як бацька дваіх дзяцей і як прэзыдэнт, я лічу, што гэтыя людзі, калі іх саджаць за краты, гэта занадта мала для таго, што яны зрабілі» — сказаў прэзыдэнт Украіны.
ГЛЯДЗІЦЕ ТАКСАМА: Зяленскі: «Расея дэпартуе тысячы ўкраінцаў, як гэта рабілі нацысты ў акупаваных краінах»Зяленскі таксама заклікаў да поўнага вываду расейскіх войскаў з Украіны «да сваіх межаў, якія існавалі прынамсі да 24 лютага».
«Гэта прымусіла б нас пачаць абмяркоўваць іншыя пытаньні пра дэакупацыю, пра тое, як мы будзем жыць пасьля гэтага», — дадаў ён.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.