Як паведамляе 30 сакавіка Reuters, у адпаведнасьці з дзейным у Нямеччыне плянам рэагаваньня на надзвычайныя сытуацыі з газам, цяперашняе папярэджаньне — першае з трох.
Міністар эканомікі Робэрт Габэк заявіў, што пастаўкі ў гэты момант забясьпечаныя і што нямецкія ўлады ўважліва сочаць за патокамі з апэратарамі рынку.
«Тым ня менш мы павінны ўзмацніць меры засьцярогі, каб быць гатовымі да эскаляцыі з боку Расеі. Пасьля абвяшчэньня ўзроўню раньняга папярэджаньня была скліканая крызісная група», — сказана ў паведамленьні міністра.
ГЛЯДЗІЦЕ ТАКСАМА: Пяскоў аб пастаўках газу ў Эўропу: «Няма аплаты — няма газу»Габэк дадаў, што каманда, у якую ўваходзяць службоўцы яго міністэрства, прадстаўнікі нямецкага сеткавага рэгулятара і сеткавых апэратараў, будзе ўважліва сачыць за сытуацыяй, «каб у разе неабходнасьці ўжыць далейшыя захады дзеля павышэньня бясьпекі паставак».
23 сакавіка прэзыдэнт Расеі Ўладзімір Пуцін даручыў перавесьці ў рублі разьлікі за газ «недружалюбным краінам». Паводле яго, «недружалюбныя краіны»-пакупнікі газу за тыдзень павінны вызначыць «парадак апзрацый набываньня рублёў на ўнутраным рынку Расеі».
ГЛЯДЗІЦЕ ТАКСАМА: Эўразьвяз усьлед за краінамі G7 адмовіўся плаціць Расеі за газ у рубляхЦэнтрабанк Расеі, урад і «Газпром», на долю якога прыпадае 40 працэнтаў імпарту газу ў Эўропу, павінны да 31 сакавіка прадставіць прэзыдэнту Ўладзіміру Пуціну свае прапановы што да аплаты газу ў рублях.
28 сакавіка краіны Вялікай сямёркі адхілілі патрабаваньне Пуціна аб аплаце газу ў рублях.