Белы дом заявіў, што новая сустрэча прэзыдэнтаў ЗША і Расеі магчымая толькі ва ўмовах «адчувальнай дээскаляцыі» расейскіх дзеяньняў ва Ўкраіне і дэманстрацыі Масквой «шчырай прыхільнасьці» да дыпляматыі.
З такой заявай выступіла на брыфінгу для журналістаў дырэктар камунікацыяў Белага дому Кейт Бэдынгфілд, паведамляе «Голас Амэрыкі».
Прэзыдэнт ЗША Джо Байдэн у панядзелак заявіў, што не выключае магчымасьці новай вочнай сустрэчы з Уладзімірам Пуціным. Аднак Байдэн адзначыў, што магчымасьць такіх перамоваў залежыць ад іх парадку дня.
«Прэзыдэнт Байдэн ясна заяўляў, што перш чым будзе такі дыялёг, спатрэбіцца адчувальная дээскаляцыя з боку Расеі і ясная, шчырая прыхільнасьць да дыпляматычнага ўзаемадзеяньня», — сказала Бэдынгфілд.
Яна дадала, што Злучаныя Штаты гатовыя спрыяць Украіне ў яе перамовах з Расеяй і падтрымліваюць удзел Кіева ў гэтым дыпляматычным працэсе. «Мы ў шчыльным кантакце з Украінай і падтрымліваем іх намаганьні дзеля ўцягваньня ў дыпляматыю і спробы дасягнуць спыненьня агню», — сказала Бэдынгфілд.
ГЛЯДЗІЦЕ ТАКСАМА: Байдэн заявіў, што ЗША ня маюць плянаў зьмены кіраўніцтва Расеі«Мы гатовыя дапамагчы чым можам і засяроджаныя на тым, каб паставіць Украіну ў найлепшую пазыцыю як на полі бою, так і за сталом перамоваў, — працягнула дырэктар. — Мы пакідаем украінцам права абмяркоўваць спэцыфіку перамоваў».
Аднак Бэдынгфілд заклікала «выразна ўсьведамляць рэальнасьць падзеяў на месцах» і не падманвацца заявамі Расеі.
«Мы лічым, што любое перамяшчэньне сілаў вакол Кіева — гэта перадысьлякацыя, а не адвод войскаў, — сказала яна. — І сьвет павінен быць гатовы да маштабнага наступу на іншыя раёны Украіны. Усім варта чакаць, што напады будуць працягвацца па ўсёй тэрыторыі Украіны».
«Мусім убачыць, што Расея рэальна робіць, перш чым давяраць толькі сказанаму ёю. Мы бачылі ад самага пачатку, што яна агрэсіўна наступала на Кіеў у пачатку гэтага канфлікту. І ня маем падстаў меркаваць, што яны зьмянілі гэтую стратэгію», — падкрэсьліла прадстаўніца Белага дому.
ГЛЯДЗІЦЕ ТАКСАМА: Байдэн зьвярнуўся да расейцаў: Успомніце 1940-я гады ў Расеі. Менавіта такі жах прынесла ва Ўкраіну расейская арміяВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.