Заснавальнік міжнароднай дасьледчай групы Conflict Intelligence Team Руслан Левіеў у інтэрвію расейскаму відэаблогеру Майклу Накі адказаў на пытаньні пра першы месяц ваенных дзеяньняў пасьля расейскага нападу на Ўкраіну.
- Тая лінія фронту, якую мы бачым цяпер (а таксама тое, якія гарады падкантрольныя расейскім сілам ці заблякаваныя), склалася прыкладна за першы тыдзень вайны.
- Апошнія тры тыдні пераважна ідуць пазыцыйныя баі. Гэта ўжо поўнамаштабная зацяжная вайна.
- Нават нашыя кансэрватыўныя ацэнкі стратаў загінулымі расейскіх вайскоўцаў ужо параўнальныя з абедзьвюма чачэнскімі кампаніямі. Паводле афіцыйных зьвестак, з боку фэдэральных сілаў у першай чачэнскай вайне было забіта каля 4100 чалавек, а ў другой — каля 4400 чалавек.
- Нашая цяперашняя ацэнка колькасьці забітых расейскіх вайскоўцаў — як мінімум 3 тысячы, але імаверна, што іх больш.
- Галоўная праблема расейскіх сілаў у цяперашняй зацяжной вайне — гэта забесьпячэньне. Не хапае харчоў і паліва.
- Асаблівыя праблемы маюць сілы расейскай Нацыянальнай гвардыі. Яна прызначаная не для вядзеньня войнаў, а для разгону пратэстаў у гарадах, і яны ня маюць паўнавартаснага тылу, у адрозьненьне ад вайскоўцаў.
- Салдатаў тэрміновай службы цяпер у асноўным не выкарыстоўваюць у ваенных дзеяньнях, але трымаюць на мяжы з Украінай.
- Мы атрымліваем інфармацыю ад расейскіх салдатаў, што многія маюць абмаражэньні, бо на ўсіх не хапае намётаў і зімовай уніформы.
- Немагчыма зразумець, ці ёсьць адзіны камандуючы ўсёй расейскай апэрацыяй. Відавочна, што ёсьць камандзіры асобных кірункаў: «Поўдзень» — наступ з Крыму, «Поўнач» — наступ у Кіеўскай вобласьці. Але выглядае, што яны слаба каардынуюцца між сабой, а каардынацыя паміж родамі войскаў таксама слабая. Гэта прыводзіць да таго, што асобныя падразьдзяленьні часам кідаюць у бой без прыкрыцьця.
- Кірунак «Поўдзень» быў найбольш пасьпяховы для расейскіх сілаў. Там яны прасунуліся да цяперашніх пазыцый даволі хутка безь вялікіх стратаў. Так, там ёсьць «эфэкт Чарнабаеўкі», дзе ўвесь час нішчаць расейскую тэхніку і асабовы склад, але ў маштабах усёй групоўкі, якая наступае з поўдня, гэта не такая вялікая частка.
- Кірунак «Чарнігаў і Сумы» — адзін з найменш пасьпяховых. Там расейскія войскі ўвесь час трацілі сілы, танкі і асабовы склад. Гэта адзін з найцяжэйшых кірункаў, бо там доўгая лінія забесьпячэньня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.