13 сакавіка расейскія тэлеграм-каналы паведамілі, што Рамзан Кадыраў нібыта знаходзіўся ва Ўкраіне і сустракаўся з чачэнскімі сілавікамі, якія ўдзельнічаюць у вайне супраць Украіны.
Расейскія прапагандысты апублікавалі відэа, зь якога нібыта вынікала, што Кадыраў знаходзіцца за 7 км ад украінскай сталіцы. Тады дарадца кіраўніка Офісу прэзыдэнта Ўкраіны Аляксей Арастовіч заявіў, што «зьяўленьне (Кадырава) нічога не вырашае. Будзе інфармацыя — зьнішчым. Ня будзе — зьнішчым наступны раз», піша «Українська правда».
Ужо раніцай 14 сакавіка Кадыраў апублікаваў у сваім Telegram-канале відэа і заявіў, што яно было зьнята ў Гастомелі за 25 км ад Кіева. Ён таксама дадаў: «Ваш інтэлект кульгае. На відэа мы ў Гастомелі. Днямі мы былі каля 20 км ад вас, кіяўляне, а цяпер яшчэ бліжэй, і здагадайцеся, наколькі мы блізкія. Заінтрыгую: можа, мы ўжо ў Кіеве, і мы толькі чакаем патрэбнай каманды?».
ГЛЯДЗІЦЕ ТАКСАМА: Кадыраў паведаміў, што прыехаў у зону баёў пад Кіевам, яму дакладвалі аб захопе дзіцячага дома: «Ложкі былі яшчэ цёплыя»Як паведамляюць крыніцы «УП» у СБУ, Кадыраў карыстаецца двума тэлефоннымі нумарамі. Паводле ўкраінскіх мабільных апэратараў, гэтыя нумары Кадырава не падключаліся да ўкраінскіх вышак сувязі ў роўмінгу апошнія 7 дзён. З дапамогай агульнадаступнага онлайн-сэрвісу журналісты паспрабавалі высьветліць IP-адрас, краіну і горад, дзе знаходзіцца нумар тэлефона Кадырава.
Сэрвіс генэруе спасылку, якая дазваляе знайсьці месцазнаходжаньне нумару, як толькі карыстальнік пяройдзе па спасылцы. У гэтым выпадку карыстальнік ні пра што не здагадваецца, бо па спасылцы ён пераходзіць на звычайны сайт, пазначаны ў спасылцы.
ГЛЯДЗІЦЕ ТАКСАМА: Кіеў: ва Ўкраіне загінулі 11 генэралаў і палкоўнікаў Расеі. Масква маўчыць, але рэгіянальныя СМІ РФ пацьвярджаюць сьмерціЖурналісты «УП» напісалі паведамленьне Кадыраву ў Telegram, назваліся журналісткай «РИА Новости» і дадалі спасылку на артыкул у той самы дзень, калі, па словах Кадырава, ён быў ва Ўкраіне і пад Кіевам. Служба знайшла наступную геалякацыю Кадырава: Расейская Фэдэрацыя, горад Грозны.
15 сакавіка ў сваім тэлеграм-канале Кадыраў апублікаваў відэа, на якім ужо знаходзіцца ў Чачэніі.
Раней службовыя аўтамабілі паліцыі Чачэнскай рэспублікі заўважылі ў беларускім Мазыры.
Таксама байцы кадыраўскага атраду казалі ў TikTok, што вядуць баі на подступах да Кіева і нават паказалі фатаздымкі ў доказ гэтаму. Аднак карыстальнікі Reddit вызначылі, што фота зробленыя ў Беларусі, а баевікі знаходзяцца ў Мазыры, у прыватнасьці, каля піўзаводу «Кімбараўка».
ГЛЯДЗІЦЕ ТАКСАМА: Як вайна мяняе сьвет. Разьвітаньне зь мітам пра вялікую РасеюВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.