Кіраўнік Чачэніі Рамзан Кадыраў напісаў у сваім тэлеграм-канале, што прыехаў у зону баявых дзеяньняў ва Ўкраіне і знаходзіцца пад Кіевам.
«З аднаго боку Кіева заходзім мы, а з другога — старыя спрактыкаваныя байцы пад кіраўніцтвам майго дарагога брата Адама Дэлімханава, якія прайшлі дзьве ваенныя кампаніі і шмат разоў дэманстравалі свае баявыя здольнасьці і дух», — заявіў Кадыраў і дадаў, што распаўсюджаны напярэдадні відэазапіс аб ягоным знаходжаньні ва Ўкраіне быў зроблены нібыта ў Гастомелі пад Кіевам.
Днём раней тэлеграм-канал тэлеканалу «Грозный ТВ», афіцыйнага тэлеканалу Чачэнскай рэспублікі, распаўсюдзіў цёмныя кадры з подпісам: «Кіраўнік ЧР Рамзан Кадыраў разам з байцамі, якія ўдзельнічаюць у спэцыяльнай ваеннай апэрацыі ва Ўкраіне».
Адзін з вайскоўцаў у гэтым відэа дакладвае Кадыраву, які стаіць побач з партрэтам свайго бацькі, Ахмата Кадырава, аб пасьпяховым «ўзяцьці» дзіцячага дома за 7 км ад Кіева.
«Стратэгія, якую вы нам падказалі, аказалася на 100% правільнай, — кажа вайсковец у відэа. — Мы ня сталі рабіць „зачыстку“ вёскі, а падышлі нахабнада гэтага дзіцячага дома. Але дзяцей там не аказалася: толькі дзьве нянечкі плакалі і ложкі былі яшчэ цёплыя! „Эсбэушнікі“ ўчора пад выглядам Чырвонага Крыжа вывезьлі гэтых дзяцей у Кіеў».
Дзе менавіта зьнята гэтае відэа і пра які дзіцячы дом ідзе гаворка — канал не паведаміў.
Дарадца міністра ўнутраных спраў Украіны Антон Герашчанка заявіў, што Кадыраў абмяркоўваў са сваім спэцназам «выкраданьне ўкраінскіх дзяцей».
ГЛЯДЗІЦЕ ТАКСАМА: У Грозным Кадыраў сабраў больш за 12 тысяч «добраахвотнікаў, гатовых выехаць на любую спэцапэрацыю»Ва Ўкраіну цяперашні час накіраваны чачэнскія часткі Расгвардыі, якія прымалі ўдзел у баях за некалькі гарадоў. А блізкія да кіраўніка Чачні рэсурсы, у тым ліку тэлеграм-канал Kadyrov_95, распаўсюджваюць відэа, у якіх кадыраўцы паведамляюць аб захопе населеных пунктаў ва Ўкраіне і аб тым, што раздаюць там прадукты мясцовым жыхарам. Адно з апошніх відэа паведамляе аб тым, што кадыраўцы знаходзяцца ў захопленым расейскімі войскамі Мелітопалі, там нядаўна выкралі законна абранага мэра горада Івана Фёдарава.
З украінскага боку аб знаходжаньні Кадырава ва Ўкраіне паведамляў дарадца Міністэрства ўнутраных спраў Украіны Антон Герашчанка. Галоўнае ўпраўленьне выведкі Міністэрства абароны Ўкраіны пакуль не рабіла адпаведных заяў.
ГЛЯДЗІЦЕ ТАКСАМА: Памерла цяжарная жанчына, якая пацярпела падчас расейскага бамбаваньня радзільні ў Марыюпалі ГЛЯДЗІЦЕ ТАКСАМА: Абстрэлы Кіева і Жытоміра, блякада Марыюпалю. Што адбываецца ў 19-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.