Дзяржаўная служба надзвычайных сытуацый Украіны апублікавала фатаздымкі, на якіх, як адзначаецца, відаць наступствы расейскіх удараў па гарадах Луганскай вобласьці — з тых, што застаюцца пад кантролем украінскіх уладаў.
ГЛЯДЗІЦЕ ТАКСАМА: Ва Ўкраіне абстралялі найбуйнейшы коксахімічны завод ЭўропыУ Севераданецку ў выніку гэтых удараў згарэлі дзясяткі жылых кватэр і будынак вышэйшай прафэсійнай вучэльні, пацярпелі два чалавекі. Раніцай у Севераданецку абстралялі катэдральны сабор, дзе знаходзіліся людзі, якія засталіся без жытла.
У Марыюпалі, абложаным расейскімі войскамі, ад пачатку вайны 18 дзён таму загінулі ўжо 2187 чалавек, паведаміла ўвечары 13 сакавіка гарадзкая рада. «Кожны дзень Марыюпаль цярпіць ад авіяналётаў. За 24 гадзіны ня менш за 22 бамбаваньні мірнага гораду», — кажуць у радзе. Мясцовыя ўлады адзначаюць, што ў горадзе заблякаваныя 400 тысяч жыхароў. «Горадам пакутнікаў» назваў у нядзелю Марыюпаль Папа Рымскі Францішак на імшы ў Ватыкане.
ГЛЯДЗІЦЕ ТАКСАМА: Гуманітарны калідор да Марыюпалю і гарадоў у Запароскай вобласьці сарваўся праз абстрэлыУ Чарнігаўскай вобласьці, на поўначы Ўкраіны, урадавыя войскі разьбілі расейскую танкавую калёну, якая прарывалася ў Кіеў, перадало 13 сакавіка ўкраінскае камандаваньне.
Дарадца кіраўніка Офісу прэзыдэнта Ўкраіны Аляксей Арастовіч назваў пакуль немагчымым наступ расейскіх сіл на Кіеў. Раней паступалі зьвесткі аб іх перагрупоўцы і значнай канцэнтрацыі за 25 кілямэтраў ад цэнтру ўкраінскай сталіцы. «Аб Кіеве можна не хвалявацца. Усе сілы, якія накіроўваліся на Кіеў, былі разьбітыя», — сьцьвярджае Арастовіч, словы якога прыводзіць «РБК-Украіна». Як піша агенцтва на сваім сайце, украінскія вайскоўцы, нягледзячы на абстрэлы, усё часцей пераходзяць у контратаку і трымаюць таксама абарону гарадоў Харкаў, Марыюпаль, Мікалаеў, Сумы, Чарнігаў і іншых.
ГЛЯДЗІЦЕ ТАКСАМА: Ля ўкраінска-польскай мяжы расейцы атакавалі ракетамі Міжнародны цэнтар міратворчасьці і бясьпекі, загінулі 35 чалавекМіністэрства абароны Расеі заявіла 13 сакавіка, што ў выніку ўдару высокадакладнай зброяй па вайсковых аб’ектах Украіны ў Львоўскай вобласьці было «зьнішчаны да 180 замежных наймітаў». У Маскве сьцьвярджаюць, што сілы так званай «ЛНР» узялі пад кантроль горад Попасная, а таксама што расейскія ўзброеныя сілы ўстанавілі поўны кантроль над населенымі пунктамі Паўлаўка, Нікольскае, Жыватворнае, Вадзянаўка і Ўладзіміраўка.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.