«Мы ня можам спыніць вайну, калі краіна-агрэсар ня хоча гэтага рабіць», — заявіў міністар замежных спраў Украіны Дзьмітро Кулеба ў чацьвер пасьля перамоваў у Антальлі з кіраўніком МЗС Расеі Сяргеем Лаўровым.
Паводле Кулебы, на сустрэчы ён пачуў, што спыненьне агню ва Ўкраіне магчымае, калі Кіеў выканае ўмовы расейскага прэзыдэнта Ўладзіміра Пуціна. Кулеба коратка ахарактарызаваў патрабаваньні Расеі як поўную капітуляцыю.
«Аднак Украіна не здаецца. Мы будзем шукаць дыпляматычных рашэньняў, а пакуль гэта не дасягнута, будзем абараняць людзей ад расейскай агрэсіі», — падкрэсьліў украінскі міністар. Ён дадаў, што Ўкраіна гатовая працягваць узаемадзеяньне з Расеяй, каб дамовіцца аб міры.
ГЛЯДЗІЦЕ ТАКСАМА: Расея адразу пасьля перамоў з Украінай у Турэччыне аднавіла абстрэлы заблякаванага МарыюпалюСяргей Лаўроў на прэс-канфэрэнцыі па выніках перамоваў зь Дзьмітром Кулебам таксама заявіў аб гатоўнасьці Масквы працягваць дыялёг. Ён адзначыў, што папярэднія тры раўнды кантактаў з украінскімі прадстаўнікамі на беларускай тэрыторыі прывялі да некаторага прагрэсу. Цяпер расейскі бок прадставіў Украіне свае прапановы па завяршэньні ўзброенага канфлікту і чакае адказу, сказаў Лаўроў.
Перамовы кіраўнікоў МЗС Украіны і Расеі ў турэцкім горадзе Антальля праходзілі ў прысутнасьці міністра замежных спраў Турэччыны Мэўлюта Чавушаглу.
Гэта была першая сустрэча на такім высокім узроўні паміж прадстаўнікамі дзьвюх краін пасьля пачатку расейскага ўзброенага ўварваньня ва Ўкраіну два тыдні таму. Заходнія краіны падкрэсьліваюць, што напад Расеі на суседнюю дзяржаву быў несправакаваны.
ГЛЯДЗІЦЕ ТАКСАМА: Расея пацьвердзіла наўмысныя абстрэлы дзіцячай лякарні ў МарыюпаліАбмеркаваньне ў Антальлі працягвалася больш за паўтары гадзіны. Яно пачалося без прысутнасьці журналістаў, у залю пусьцілі толькі некалькіх апэратараў і фатографаў.
Дзьмітро Кулеба раней называў тры ключавыя патрабаваньні, якія ён выставіць на сустрэчы з Лаўровым. Гэта спыненьне агню, вызваленьне акупаваных тэрыторый і вырашэньне гуманітарных пытаньняў.
Пасьля перамоваў Кулеба заявіў, што ўкраінскім бокам падымалася пытаньне аб сутачным замірэньні, каб вырашыць найвастрэйшыя гуманітарныя пытаньні, але прагрэсу дасягнута не было. «Падобна на тое, у Расеі іншыя людзі прымаюць рашэньне з гэтай нагоды», — прыводзіць словы Кулебы «РБК-Украіна». Са спасылкай на Кулебу, у прыватнасьці, паведамляецца, што расейскі міністар Лаўроў ня стаў браць на сябе абавязаньне забесьпячыць гуманітарны калідор з абложанага Марыюпаля.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.