Нацыянальная кампанія «Укренерго» паведаміла, што ў выніку пашкоджаньня расейскімі войскамі высакавольтнай лініі, якая забясьпечвала электраэнэргіяй аварыйную Чарнобыльскую АЭС, зону адчужэньня і горад Славуціч, немагчыма кантраляваць парамэтры ядзернай і радыяцыйнай бясьпекі ў рэгіёне.
Цяпер у адным са сховішчаў захоўваецца каля 20 тысяч зборак з адпрацаваным ядзерным палівам. Гэтыя зборкі патрабуюць пастаяннага ахалоджваньня, якое магчымае толькі пры наяўнасьці электрычнасьці. Калі лінію не адновяць, можа павялічыцца тэмпэратура, пачнецца параваньне, і радыяактыўныя рэчывы трапяць у паветра. Вецер можа перанесьці радыяактыўную хмару ў іншыя рэгіёны Ўкраіны, у Беларусь, Расею і эўрапейскія краіны.
Апроч таго, не працуе і вэнтыляцыя, у выніку чаго ўвесь пэрсанал, які знаходзіцца на ЧАЭС, атрымае небясьпечную дозу апраменьваньня.
Не функцыянуе і сыстэма пажаратушэньня, і гэта, як падкрэсьлілі ў кампаніі «Укренерго», — вялізная рызыка пажару, які можа пачацца пры абстрэле.
Цяпер на пляцоўцы Чарнобыльскай АЭС уключылі аварыйныя дызэль-генэратары для забесьпячэньня дзейнасьці сыстэмаў, неабходных для бясьпекі.
«Пры ўмове іхнай спраўнай працы запасу дызэльнага паліва на генэратарах хопіць на 48 гадзін», — падкрэсьлілі ў кампаніі.
Расейскія вайскоўцы не дазволілі ўкраінскай рамонтнай брыгадзе выехаць на аднаўленьне электралініі ЧАЭС
Украінская рамонтная брыгада спрабавала выехаць да пашкоджанай лініі электраперадач, каб аднавіць энэргазабесьпячэньне Чарнобыльскай АЭС і іншых ядзерных аб’ектаў у зоне адчужэньня.
У кампаніі «Укренерго» журналістам Радыё Свабода паведамілі, што правесьці рамонт не змаглі празь няспынныя абстрэлы і запалохваньні з боку расейскіх вайскоўцаў.
Журналісты апублікавалі запіску выканаўцы абавязкаў генэральнага дырэктара ЧАЭС Валерыя Сейды аб тым, што на рамонт ёсьць толькі 48 гадзін. Пасьля гэтага кантроль над ядзернымі аб’ектамі будзе страчаны.
«Паводле інфармацыі дыспэтчарскага цэнтру, прычынай абясточваньня стаў абрыў лініі электраперадач, месца абрыву невядомае. Для аднаўленьня электразабесьпячэньня неабходна тэрмінова даць калідоры для рамонтных брыгад», — адзначае кіраўнік ЧАЭС у сваёй запісцы.
ЧАЭС падключаць да рэзэрвовых генэратараў
Чарнобыльскую АЭС падключаць да рэзэрвовых дызэль-генэратараў, яны забясьпечаць сілкаваньне станцыі і ўсіх аб’ектаў на 48 гадзін. Пасьля гэтага адключыцца сыстэма ахаладжэньня адпрацаванага ядзернага паліва, што можа прывесьці да ўцечкі радыяцыі, заявіў міністар замежных спраў Украіны Дзьмітры Кулеба.
ГЛЯДЗІЦЕ ТАКСАМА: ЧАЭС цалкам абясточаная. Што адбываецца на ўкраінскіх атамных станцыях, акупаваных расейскімі войскамі«Укренерго»: Чарнобыльская АЭС цалкам абясточаная
«Баявыя дзеяньні працягваюцца, што зараз робіць немагчымымі рамонтныя працы і аднаўленьне энергасілкаваньня. „Укренерго“ маніторыць сытуацыю і будзе інфармаваць пра ўсе зьмены», — гаворыцца ў паведамленьні «Укренерго». Абясточаны таксама горад Славуціч.
Закрытая пасьля аварыі 1986 году ЧАЭС знаходзіцца пад кантролем расейскіх войскаў, якія прыйшлі з тэрыторыі Беларусі.
Нацыянальная кампанія «Укренерго» раней заявіла, што на дзьвюх захопленых атамных электрастанцыях, у Чарнобылі і Энэргадары, застаецца пагроза ядзернай і радыяцыйнай бясьпецы.
Запароская АЭС
Паводле інфармацыі кампаніі, на тэрыторыі Запароскай АЭС у Энэргадары знаходзіцца 50 адзінак вайсковай тэхнікі, каля 400 вайскоўцаў, а таксама шмат выбухоўкі і зброі.
«І хоць на ўсіх шасьці энэргаблёках АЭС працуе наш пэрсанал, усе тэхнічныя пытаньні кіраўніцтва станцыі вымушана ўзгадняць з акупантамі», — паведамілі ў «Укренерго».
Паводле інфармацыі кампаніі «Укренерго», супрацоўнікі станцыі знаходзяцца пад моцным псыхалягічным ціскам расейцаў, якія чакалі, што іх «сустрэнуць на станцыі з радасьцю, але ўкраінцы супраціўляліся, адмаўляючыся супрацоўнічаць з захопнікамі, і не хавалі сваёй адкрытай варожасьці да іх».
У кампаніі таксама адзначылі, што напярэдадні расейскія журналісты спрабавалі запісаць пазытыўныя інтэрвію з пэрсаналам, каб выкарыстаць іх у прапагандзе. Але прадстаўнікі станцыі адмовіліся.
«Усё гэта нэгатыўна ўплывае на працу і ставіць пад пагрозу ядзерную і радыяцыйную бясьпеку. Аварыя можа адбыцца ў любое імгненьне, а яе наступствы непрагназаваныя».
Цяпер з шасьці блёкаў Запароскай АЭС працуюць толькі два.
ГЛЯДЗІЦЕ ТАКСАМА: Генпракурор Нямеччыны пачаў расьследаваньне ваенных злачынстваў Расеі ва ЎкраінеЧарнобыльская АЭС
На Чарнобыльскай АЭС дагэтуль без ратацыі працуе пэрсанал, які выйшаў на зьмену 24 лютага, калі Расея пачала вайну з Украінай.
Украінскія ўлады папрасілі Міжнароднае агенцтва атамнай энэргіі (МАГАТЭ) дапамагчы забясьпечыць ратацыю пэрсаналу Чарнобыльскай АЭС. Вядзецца пра 210 спэцыялістаў, паведамляецца на сайце МАГАТЭ.
У пэрсаналу ЧАЭС абмежаваны доступ да ежы, вады і лекаў. Сувязь зь імі захавалася толькі праз электронную пошту. Праца зь ядзернымі матэрыяламі на станцыі пакуль прыпыненая.
ГЛЯДЗІЦЕ ТАКСАМА: МАГАТЭ страціла сувязь з інфармацыйнай сыстэмай ЧАЭС. Украіна просіць дапамагчы з ратацыяй пэрсаналу ГЛЯДЗІЦЕ ТАКСАМА: Парашэнка пра дзеяньні Лукашэнкі: «Зь Беларусі праз Чарнобыль подла ўдарылі ў сьпіну»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.