Пра страты на фронце з украінскага боку кіраўніцтва краіны і камандаваньне Ўзброеных сіл Украіны не паведамляе. Інфармацыі пра палеглых вайскоўцаў, а таксама страты ўзбраеньня і тэхнікі адсутнічаюць у штодзённых зводках аб выніках баявых дзеяньняў. Вядомыя толькі лічбы ахвяраў сярод мірнага насельніцтва. Гэтая лічба, паводле афіцыйных зьвестак, дасягае 500 і расьце. ВВС News Україна зьвярнулася да экспэртаў па тлумачэньні, чаму вайсковыя страты не публікуюцца.
Удзельнік Антытэрарыстычнай апэрацыі на Данбасе Яўген Дзікі перакананы, што інфармацыя пра баявыя страты ўкраінскіх войскаў — знаходка для праціўніка, таму публікаваць іх у час вайны недапушчальна.
«У цяперашні час інфармацыя аб нашых стратах павінна быць ня менш канфідэнцыйнай, чым інфармацыя аб разьмяшчэньні нашых войскаў і пастаўках зброі і боепрыпасаў. Страты праціўніка патрэбны ня толькі для прапаганды. Гэта вельмі каштоўная інфармацыя для праціўніка, і яна ні ў якім разе не павінна давацца яму. Ні аб агульных стратах, ні аб стратах на асобных участках або ў канкрэтных баях».
ГЛЯДЗІЦЕ ТАКСАМА: Украінскі Генштаб: «Расея працягвае наступаць, але тэмп значна запаволіўся»На гэтым настойвае і гісторык Аляксей Капацько.
«Каб не раскрываць праціўніку стан падразьдзяленьняў, дадзеных аб стратах у нашых баявых частках наогул ня будзе, альбо яны будуць максымальна расплывістымі/безасабовымі. Пакуль гэта неабходнасьць».
Вайсковы аглядальнік Вячаслаў Шрамовіч кажа, што раскрыцьцё інфармацыі аб стратах можа быць дэматывацыйным.
«Ва Ўкраіне ўжо ёсьць досьвед 2014 году, калі праз сапраўдную або фальшывую інфармацыі аб ахвярах сваякі вайскоўцаў ладзілі акцыі пратэсту з патрабаваньнем вывесьці войскі з „катлоў“, з Ілавайску і Дэбальцава. Удар у тыл».
ГЛЯДЗІЦЕ ТАКСАМА: Нацыянальная выведка ЗША: Пуцін можа наважыцца на далейшую эскаляцыю ва ЎкраінеУ той жа час вайсковы экспэрт Міхаіл Жырахаў лічыць, што непадача афіцыйных дадзеных аб стратах украінскіх вайскоўцаў стварае недавер да афіцыйных крыніц інфармацыі. Ён кажа, што вайсковае кіраўніцтва краіны з пачатку вайны вырашыла, што публікацыя страты асабовага складу можа дэмаралізаваць вайскоўцаў.
«Але ў сучасным лічбавым сьвеце ўтойваньне страт вядзе толькі да росту недаверу да афіцыйных крыніц. Інфармацыя па-ранейшаму прасочваецца праз сацыяльныя сеткі. Грамадзтву трэба разумець, што мы ваюем зь вялікім і падрыхтаваным ворагам, і кожная наша перамога аплачваецца жыцьцём нашых абаронцаў», — сказаў ён у камэнтары.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.