Намесьніца дзяржсакратара ЗША Вікторыя Нуланд выступіла на слуханьнях у Сэнацкім камітэце замежных спраў.
«Гэта вайна, якая была пачата адным чалавекам на падставе ягоных скажоных разьлікаў», — сказала Нуланд сэнатарам, якую цытуе «Голас Амэрыкі».
"Гэта вайна, якая пабудавана на хлусьні, якую ён сказаў і свайму народу, і ўсяму сьвету, і сваім узброеным сілам, — працягнула намесьніца дзяржсакратара. — А цяпер яна пабудавана таксама на горычы і пакутах як шматлікіх украінцаў, так і расейцаў — бацькоў, сужэнцаў, партнэраў, дзяцей, якія больш ніколі ня ўбачаць сваіх любых. І ўсё гэта вынік зладзейскага выбару аднаго чалавека«.Нуланд асудзіла рэпрэсіі супраць антываеннага руху, якія разгарнуліся ў Расеі, а таксама абмежаваньні на дзейнасьць сродкаў масавай інфармацыі.«З трыццацьцю гадамі прагрэсу ў Расеі было пакончана за 10 дзён», — заявіла яна.
Намесьніца дзяржсакратара заклікала міжнародную супольнасьць згуртавацца вакол Украіны ў цяжкі для яе час.
«Разам мы мусім зрабіць усё магчымае, каб Украіна ня толькі выжыла, але і квітнела», — заявіла Нуланд.
Між тым кіраўнікі выведніцкай супольнасьці ЗША заявілі ў аўторак, што Ўладзімір Пуцін можа пачаць эскаляцыю наступу ва Ўкраіне, нягледзячы на вайсковыя няўдачы і эканамічныя цяжкасьці, выкліканыя міжнароднымі санкцыямі.
«Нашы аналітыкі лічаць, што Пуціна наўрад ці спыняць такія няўдачы і што ён... можа пайсьці на эскаляцыю», — сказала дырэктарка нацыянальнай выведкі Аўрыл Гэйнз на штогадовых слуханьнях аб міжнародных пагрозах Камітэта выведкі Палаты прадстаўнікоў.
ГЛЯДЗІЦЕ ТАКСАМА: Хто ў Беларусі за вайну і што на гэта ўплывае? Дыскусія экспэртаўПа словах Гэйнз, пры такой высокай напружанасьці заўсёды існуе магчымасьць «ненаўмыснай эскаляцыі».
«Я думаю, што Пуцін зараз злы і засмучаны. Ён, пэўна, падвоіць стаўку і паспрабуе раздушыць украінскую армію, не зьвяртаючы ўвагі на ахвяры сярод цывільнага насельніцтва», — сказаў дырэктар ЦРУ Ўільям Бэрнс. Ён адзначыў, што ЗША актыўна абменьваюцца дадзенымі выведкі з Украінай.Бэрнс таксама канстатаваў, што ён і аналітыкі ЦРУ ня бачаць, як Пуцін можа дасягнуць сваіх мэтаў — захапіць Кіеў і замяніць урад Уладзіміра Зяленскага прамаскоўскім марыянэткавым кіраўніцтвам.
ГЛЯДЗІЦЕ ТАКСАМА: Працяг эвакуацыі з Сумаў, новыя санкцыі супраць Расеі і Беларусі. 14-ы дзень расейскай вайны ва ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.