Вярхоўны камісар ААН у справах уцекачоў Філіпа Грандзі заявіў, што колькасьць людзей, якія ўцякаюць ад вайны ва Ўкраіне, дасягнула 2 мільёнаў чалавек.
Пра гэта Грандзі сказаў на прэс-канфэрэнцыі ў Осла пасьля наведваньня Малдовы, Польшчы і Румыніі, якія прымаюць уцекачоў, што перасякаюць мяжу з Украіны ад 24 лютага.
Чыноўнік сказаў, што для параўнаньня, бальканскія войны ў Босьніі і Герцагавіне і Косаве прывялі да бежанства «магчыма, ад 2 да 3 мільёнаў чалавек, але на працягу васьмі гадоў». Тады мясцовае насельніцтва пакідала краіну, у прыватнасьці, у кірунках Швайцарыі і скандынаўскіх краін, каб пазьбегчы сэрбскага генацыду.
Вярхоўная прадстаўніца ААН у правах чалавека Мішэль Бачэлет заклікала да бясьпечнага сыходу мірных жыхароў, якія апынуліся ў пастцы ў шматлікіх зонах ваенных дзеяньняў ва Ўкраіне.
«Я паўтараю свой настойлівы заклік да спыненьня ваенных дзеяньняў», — сказала Бачэлет у відэазвароце да Рады ў правах чалавека.
ГЛЯДЗІЦЕ ТАКСАМА: Ціханоўская ў Бэрліне выступіла за статус ваенных уцекачоў для беларусаў, якія цяпер выяжджаюць з Украіны і Беларусі7 сакавіка ААН ацэньвала колькасьць украінскіх уцекачоў у больш як 1,7 мільёна чалавек. У прыватнасьці, звыш мільёна зь іх паехалі ў Польшчу, дзе ім аказваюць тэрміновую дапамогу з жытлом, мэдыцынай, харчамі і рэчамі першай неабходнасьці.
Ужо тры разы зрываліся гуманітарныя калідоры з украінскіх гарадоў празь невыкананьне расейскім войскам дамоваў. Гэта адбывалася або празь мінаваньне дарогі, або праз раптоўнае ўзнаўленьне баёў.
ГЛЯДЗІЦЕ ТАКСАМА: Пачынаецца эвакуацыя жыхароў атакаванага Расеяй гораду Сумы. Масква абяцала рэжым цішыні, раней яна зрывала дамоўленасьціУ выніку першых дзесяці дзён вайны ва Ўкраіне пад расейскімі абстрэламі загінулі як сама меней 38 дзяцей, і гэтая статыстыка працягвае расьці. Раніцай 8 сакавіка пасьля атакі на Сумы загінуў 21 чалавек, у тым ліку 2 дзяцей.
З Харкава, які некалькі дзён інтэнсіўна бамбавала расейская авіяцыя, эвакуавалі амаль траціну ўсяго насельніцтва гораду — звыш 600 тысяч чалавек.
ГЛЯДЗІЦЕ ТАКСАМА: 13-ы дзень расейскай вайны ва Ўкраіне: бамбаваньне Сумаў, гуманітарныя калідоры, новыя санкцыі супраць Расеі і БеларусіВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.