Хроніка перасьледу 23 лютага: затрымалі доктара Мартава, які першым расказаў праўду пра каранавірус

Затрымалі віцебскага лекара, які першым расказаў праўду пра каранавірус

22 лютага затрымалі віцебскага лекара Ўладзімера Мартава. Гэта адбылося на ягоным лецішчы пад Лепелем. Цяпер ён знаходзіцца ў ІЧУ Лепеля. Пра гэта напісала журналістка Тацяна Мацьвеева ў сваім Facebook са спасылкай на жонку Мартава Алену.

Суд пройдзе 23 лютага. Вядома, што доктара абвінавачваюць у парушэньні артыкула 24.23 КаАП. Іншых падрабязнасьцяў няма.

Алена Мартава 23 лютага паехала да мужа ў Лепель, хацела перадаць яму лекі. Ён гіпэртонік, і гэтыя лекі патрэбны яму пастаянна. Аднак лекі перадаць не дазволілі.

«Сказалі, калі раптам вашаму мужу стане кепска, то выклічам хуткую дапамогу», — кажа Алена Мартава.

Уладзімер Мартаў стаў першым лекарам у краіне, які ў красавіку 2020 году, у разгар эпідэміі каранавірусу, не пабаяўся публічна агучыць свае думкі пра тое, што адбывалася тады ў шпіталях, акрэсьліўшы сапраўдныя маштабы хваробы ў Беларусі.

Неўзабаве споўніцца год, як прадстаўніку знакамітай віцебскай дынастыі лекараў, кандыдату мэдычных навук, загадчыку аддзяленьня анэстэзіялёгіі і рэанімацыі Віцебскай гарадзкой клінічнай лякарні хуткай мэдычнай дапамогі Ўладзімеру Мартаву не падоўжылі кантракт.

На Радыё Свабода выйшаў цыкль падкастаў з доктарам Мартавым пра каранавірус.

Віцебскага фотамастака і краязнаўцу Віктара Барысенкава пасадзілі на 10 содняў

Увечары 21 лютага віцебскага фотамастака і краязнаўцу Віктара Барысенкава забралі адбываць 10-дзённы арышт, прысуджаны яшчэ ўвосень. Пра гэта паведаміў адзін зь сяброў Віктара Барысенкава.

Паводле крыніцы, на 10 дзён арышту фотамастака асудзілі за той жа фатаздымак, за які ў жніўні 2021 году ён адбыў 7 содняў, але з прысудам не пагадзіўся, паведамляе «Вясна».

Агулам Віктару Барысенкаву прысудзілі 17 содняў. 7 зь іх ён адбыў яшчэ ўвосень. Астатнія 10 «адклалі»; як патлумачылі міліцыянты, яго «забяруць, калі будзе трэба».

Віктар Барысенкаў вядомая ў Віцебску асоба. Ён аўтар мастацкіх фотапраекцыяў, якія дазваляюць убачыць страчаныя помнікі архітэктуры, і гэтыя ягоныя работы неаднаразова экспанавалі на гарадзкіх выставах. Таксама Віктар Барысенкаў мае некалькі грамат ад навучальных і культурных установаў, дзе ён чытаў лекцыі па гісторыі Віцебску.

У Бабруйску затрымалі актывіста Івана Манько

Папярэдне, затрыманьне хлопца зьвязана з «прэвэнтыўнай зачысткай» перад рэфэрэндумам, паведамляе «Бобруйск online».

Затрыманьні ў Менску і рэгіёнах

23 лютага на выхадзе з кватэры супрацоўнікамі ГУБАЗіК быў затрыманы мянчук Андрэй Бясько. У яго кватэры, а таксама ў кватэры ягонай маці прайшлі ператрусы. Забралі пляншэт, ноўтбук і тэлефон сына. Вядома, што Андрэя павезьлі ў Кастрычніцкае РУУС.

22 лютага ў сталіцы затрымалі настаўніцу ангельскай мовы Ганну Барысовіч і дзьвюх яе дачок — Яну і Тацяну Барысовіч. Дома ў іх прайшоў вобшук у межах крымінальнай справы.

Таксама паведамляюць пра затрыманьне ў Менску ў гэты дзень Уладзімера Сапегі.

У Белаазёрску 23 лютага каля 7 раніцы затрымалі для гутаркі Уладзімера Зубрыцкага. Сутнасьць справы пакуль невядомая.