Расея паведаміла, што закончыла вайсковыя вучэньні ў анэксаваным Крыме

Падразьдзяленьні Паўднёвай вайсковай акругі пакінулі анэксаваны Крым пасьля завяршэньня тактычных вучэньняў на палігонах, разьмешчаных на паўвостраве, паведаміў «Інтэрфакс» са спасылкай на Мінабароны Расеі.

Вайскоўцы і баявая тэхніка, у тым ліку танкі, баявыя машыны пяхоты і артылерыйскія ўстаноўкі, чыгункай вяртаюцца ў пункты пастаяннай дысьлякацыі. Па дадзеных вайскоўцаў, войскі ўжо перасеклі Керчанскую пратоку па Крымскім мосьце.

Перад завяршэньнем вучэньняў разьлікі рэактыўных сыстэм залпавага агню (РСЗА) «Ураган» і «Град» правялі баявую стральбу на палігоне Апук за 40 кілямэтрах ад Керчы.

Паўвостраў Крым, які зьяўляецца аўтаномным рэгіёнам у складзе Ўкраіны, быў акупаваны Расеяй у 2014 годзе. Крэмль неадкладна разгарнуў там сваю палітыку перасьледу іншадумцаў: шмат праўкраінскіх дзеячоў, у прыватнасьці крымскіх татараў, на доўгія тэрміны адправіліся за краты праз абвінавачаньні, якія праваабаронцы лічаць палітычна матываванымі. Некалькі чалавек прапалі бязь вестак. Перасьлед трывае і ў 2022 годзе.

Міжнародная супольнасьць лічыць Крым тэрыторыяй Украіны і наклала на Расею за акупацыю тэрыторыі эканамічныя санкцыі. Беларусь афіцыйна не прызнала Крым расейскім, аднак Лукашэнка і яго атачэньне ўжо неаднаразова на словах сьцьвярджала, што прызнае права Масквы на гэтую тэрыторыю.