ЗША накіруюць у Польшчу яшчэ 3 тысячы вайскоўцаў

Разгортваньне будзе праводзіцца сіламі 82-й Паветрана-дэсантнай дывізіі, паведамляе «Голас Амэрыкі» са спасылкай на крыніцы ў адміністрацыі Белага дому.

У бліжэйшыя дні Злучаныя Штаты накіруюць у Польшчу дадатковы вайсковы кантынгент — яшчэ 3 тысячы вайскоўцаў, каб супакоіць саюзьнікаў па NATO, паведаміла «Голасу Амэрыкі» высокапастаўленая крыніца ў абаронным ведамстве. Міністар абароны Лойд Остын паводле ўказаньня прэзыдэнта Джо Байдэна аддаў у пятніцу загад аб адпраўцы 3 тысяч вайскоўцаў баявой групы 82-й Паветрана-дэсантнай брыгады, што базуецца ў Форт-Брэгу (штат Паўночная Караліна).

У наступныя некалькі дзён яны далучацца да 1,7 тысячы вайскоўцаў, загад аб адпраўцы якіх у Польшчу Остын падпісаў 2 лютага.

«У цэлым гэтыя 5 тысяч дадатковых вайскоўцаў уяўляюць сабой высокамабільныя і гнуткія сілы, здольныя выконваць мноства задач. Іх разгортваюць, каб супакоіць нашых саюзьнікаў па NATO, стрымаць любую магчымую агрэсію супраць усходняга флянгу NATO, праводзіць вучэньні зь сіламі прымаючай краіны і ўносіць свой унёсак у шырокі спэктар непрадбачаных абставін», — сказала крыніца ў Пэнтагоне.

Дадатковае разгортваньне амэрыканскіх вайскоўцаў у Польшчы і Нямеччыне «носіць часовы характар» і прызначана для таго, «каб на кароткі час дапоўніць больш як 80 000 амэрыканскіх вайскоўцаў, якія ўжо знаходзяцца ў Эўропе ў парадку ратацыі і на пастаяннай аснове», дадаў суразмоўца.

На гэты момант 8,5 тысячы амэрыканскіх вайскоўцаў ужо знаходзяцца ў стане гатоўнасьці да разгортваньня ў Эўропе ў выпадку неабходнасьці, і амаль 3 тысячы салдат, пра што адміністрацыя заявіла раней у гэтым месяцы, будуць адпраўленыя ў Польшчу і Румынію.

Хоць цяпер у Злучаных Штатаў няма караблёў у Чорным моры, ВМС ЗША за апошнія тыдні накіравалі ў Эўропу яшчэ чатыры эсьмінцы.

ГЛЯДЗІЦЕ ТАКСАМА: Белы дом: напад Расеі на Ўкраіну можа пачацца «ў любы час»

«Буйнамаштабнае разгортваньне» сіл

Расея ўжо сканцэнтравала больш за 100 тысяч вайскоўцаў паблізу Ўкраіны і працягвае сьцягваць да ўкраінскай мяжы дадатковыя войскі. Уварваньне можа адбыцца ў любы час, магчыма, да заканчэньня зімовых Алімпійскіх гульняў у гэтым месяцы. Пра гэта 11 лютага заявілі дзяржсакратар ЗША Энтані Блінкен і дарадца прэзыдэнта ЗША па нацыянальнай бясьпецы Джэйк Саліван.

ГЛЯДЗІЦЕ ТАКСАМА: Дзяржсакратар ЗША Энтані Блінкен дапусьціў, што Расея можа ўварвацца ва Ўкраіну падчас Алімпіяды

Спадарожнікавыя здымкі, апублікаваныя амэрыканскай прыватнай кампаніяй Maxar Technologies, паказалі новыя агмяні дысьлякацыі расейскіх вайскоўцаў у некалькіх раёнах недалёка ад украінскай мяжы.

У кампаніі заявілі, што здымкі, зробленыя ў сераду і чацьвер, паказалі значнае новае разгортваньне расейскіх вайскоўцаў у некалькіх месцах у анэксаваным Крыме, на захадзе Расеі і ў Беларусі.

У Крыме экспэрты выявілі новую буйную дысьлякацыю войскаў і тэхнікі на аэрадроме Кастрычніцкае на поўнач ад Сімфэропаля, у тым ліку 550 вайсковых палатак і сотні аўтамабіляў. Новыя войскі і тэхніка таксама прыбылі ў раён крымскага Новаазёрнага, гаворыцца ў паведамленьні. Там жа гаворыцца пра новую дысьлякацыю ў раёне гораду Слаўнае на паўночна-заходнім узьбярэжжы паўвострава.

ГЛЯДЗІЦЕ ТАКСАМА: Спадарожнікавыя здымкі паказалі новыя базы расейскіх войскаў у Крыме і ў іншых месцах каля мяжы Ўкраіны. ФОТА

У Беларусі, дзе праходзяць буйныя сумесныя расейска-беларускія вучэньні, Maxar знайшоў новую дысьлякацыю войскаў, вайсковай тэхнікі і верталётаў на аэрадроме Зябраўка недалёка ад Гомля, менш як за 25 км ад мяжы з Украінай.

ГЛЯДЗІЦЕ ТАКСАМА: Зьявіліся спадарожнікавыя здымкі дыслякацыі расейскіх войскаў каля Гомля. ФОТА

У заяве, адпраўленай па электроннай пошце позна ўвечары ў чацьвер, гаворыцца, што на палігон у Курску, прыкладна за 110 км на ўсход ад украінскай мяжы, нядаўна прыбыла вялікая колькасьць вайскоўцаў.

Адна з крыніц агенцтва Reuters назвала дзеяньні Масквы «буйнамаштабным разгортваньнем» вайсковых сіл.

Масква адмаўляе пляны ўварваньня ва Ўкраіну, але кажа, што можа распачаць невядомыя «вайскова-тэхнічныя» дзеяньні, калі ня будзе выкананы шэраг патрабаваньняў Крамля, у тым ліку абяцаньне NATO ніколі не прымаць у свае шэрагі Ўкраіну і вывесьці войскі з Усходняй Эўропы.

ГЛЯДЗІЦЕ ТАКСАМА: Раптоўнасьць, колькасьць удзельнікаў, месцы правядзеньня. Чаму «Саюзная рашучасьць — 2022» — ня проста вучэньні

ГЛЯДЗІЦЕ ТАКСАМА: «Расейскія вучэньні ў Беларусі могуць стаць няспыннымі», — польскі аналітык

Пагроза нападу Расеі на Ўкраіну

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.