Што абяцае ваенная дактрына саюзу Беларусі і Расеі

19-старонкавы дакумэнт апублікаваны на сайце пастаяннага камітэту «саюзнай дзяржавы».

У дактрыне адзначаецца, што «ваенна-палітычная абстаноўка, якая складваецца вакол СД, характарызуецца ўзрастаньнем нэгатыўных працэсаў у сфэры глябальнай і рэгіянальнай бясьпекі, абумоўленых як геапалітычным суперніцтвам паміж вядучымі сусьветнымі дзяржавамі, так і сутыкненьнем інтарэсаў асобных дзяржаваў і іх кааліцыяў».

У дакумэнце пералічваюцца асноўныя вонкавыя ваенныя рызыкі. Сярод іх:

• нарошчваньне вайсковага патэнцыялу асобных дзяржаваў, а таксама стварэньне або разьмяшчэньне ў краінах, якія суседнічаюць з саюзнай дзяржавай, вайсковых фармаваньняў высокай ступені гатоўнасьці;
• дзейнасьць па дэстабілізацыі становішча ў краінах, сумежных з саюзнай дзяржавай, а таксама ў дзяржавах – чальцах АДКБ;
• распрацоўка асобнымі дзяржавамі мэханізмаў распальваньня ўнутраных узброеных канфліктаў у іншых краінах для зьмены дзейнай улады або парушэньня іх тэрытарыяльнай цэласнасьці з выкарыстаньнем магчымасьцяў сілаў спэцыяльных апэрацыяў, прыватных вайсковых кампаніяў і незаконных узброеных фармаваньняў;
• распаўсюд зброі масавага зьнішчэньня, а таксама намеры яго разьмяшчэньня ў краінах – суседках СД;
• стварэньне спэцыялізаваных структур для аказаньні інфармацыйнага ўзьдзеяньня на органы дзяржаўнага і вайсковага кіраваньня, інфраструктуру і насельніцтва дзяржаваў-удзельніц;
• дзейнасьць міжнародных тэрарыстычных і экстрэмісцкіх арганізацыяў, прыватных вайсковых кампаніяў па стварэньні ўласных узброеных фармаваньняў.

Асноўнымі ваеннымі пагрозамі СД краіны-ўдзельніцы прызнаюць:

• канцэнтрацыю ўзброеных сілаў іншай дзяржавы або дзяржаваў уздоўж межаў дзяржаваў — удзельніц ва Ўсходне-Эўрапейскім рэгіёне калектыўнай бясьпекі, якая ўказвае на намер ужыць вайсковую сілу супраць СД;
• узьнікненьне на тэрыторыях дзяржаваў, сумежных з СД, узброеных канфліктаў, накіраваных супраць жыцьцёва важных інтарэсаў СД;
• правядзеньне ў іншай дзяржаве (іншых дзяржавах) мабілізацыі ў мэтах учыненьня акту ўзброенай агрэсіі супраць СД;
• выкарыстаньне інфармацыйна-камунікацыйных тэхналёгіяў для варожых дзеяньняў, якія ўяўляюць пагрозу міжнароднай бясьпецы, у тым ліку накіраваных на дыскрэдытацыю дзяржаваў-удзельніц, парушэньне іх тэрытарыяльнай цэласнасьці і дзяржаўнага сувэрэнітэту, умяшаньне ў іх унутраныя справы;
• іншую дзейнасьць іншай дзяржавы, экстрэмісцкіх, тэрарыстычных арганізацыяў, разьмешчаных на тэрыторыі іншай дзяржавы, уключаючы заявы, дэманстрацыю сілы, якія ўчыняюцца ў парушэньне Статуту ААН і паказваюць на падрыхтоўку да нападу на СД.

У якасьці асноўных захадаў для гарантаваньня ваеннай бясьпекі дзяржавы-ўдзельніцы разглядаюць у мірны час (сярод іншага):

• фармаваньне і ажыцьцяўленьне ўзгодненай ваеннай палітыкі;
• правядзеньне ў інтарэсах сумеснай абароны ўзгодненай мабілізацыйнай падрыхтоўкі эканомік;
• фармаваньне адзінай памежнай прасторы, ахову дзяржаўных межаў;
• рэалізацыя міжнародных абавязаньняў у сфэры раззбраеньня, кантролю над узбраеньнямі і мераў па ўмацаваньні даверу і бясьпекі, заключэньне новых дамоўленасьцяў у гэтай галіне бяз шкоды для абараназдольнасьці дзяржаваў-удзельніц;
• пашырэньне вайсковага і вайскова-тэхнічнага супрацоўніцтва зь дзяржавамі – чальцамі АДКБ, а таксама зь іншымі дружалюбнымі краінамі;
• разьвіцьцё і падтрыманьне ў баявой гатоўнасьці аб’яднаных вайсковых сыстэмаў.

У ваенны час:

• комплекс мерапрыемстваў па ўзброенай абароне СД;
• сумесныя рашэньні па вядзеньні ваенных дзеяньняў па адбіцьці нападу;
• выкарыстаньне магчымасьцяў міжнародных арганізацыяў для прымусу агрэсара да спыненьня ваенных дзеяньняў супраць дзяржаваў-удзельніц.

Ядзерная зброя

У дактрыне ўказваецца, што ядзерная зброя РФ будзе заставацца важным фактарам прадухіленьня ўзьнікненьня ядзерных ваенных канфліктаў і ваенных канфліктаў з ужываньнем звычайных сродкаў паражэньня.

У новай Ваеннай дактрыне СД наўпрост не пазначана, што расейская ядзерная зброя можа быць разьмешчана дзе-небудзь за межамі РФ.

Прэзыдэнт Францыі Эманюэль Макрон падчас прэсавай канфэрэнцыі пасьля перамоваў з прэзыдэнтам РФ Ўладзімірам Пуціным заявіў, што Пуцін «супакоіў» яго адносна таго, што расейская ядзерная зброя ня будзе разьмяшчацца ў Беларусі.