У інтэрвію расейскаму агенцтву ТАСС Вікторыя Нуланд заявіла аб пагрозе «вялікай вайны ў Эўропе» — у сувязі з абвастрэньнем сытуацыі вакол Украіны — і патлумачыла пазыцыю Злучаных Штатаў у пытаньні перамоваў з Расеяй аб так званых гарантыях бясьпекі.
Паводле Нуланд, Вашынгтону і Маскве «надышоў час вярнуцца за стол перамоваў і працаваць над кантролем над узбраеньнямі, над скарачэньнем ваенных рызык, удасканальваць і дашліфоўваць наяўную сыстэму пад рэаліі XXI стагодзьдзя, а не выкідваць яе ў акно і, безумоўна, ня мець вялікую вайну у Эўропе».
ГЛЯДЗІЦЕ ТАКСАМА: Амэрыканскія дэсантнікі вылецелі ва Ўсходнюю ЭўропуНамесьніца Дзяржсакратара таксама пракамэнтавала асьцярогі Расеі наконт таго, што пашырэньне NATO нібыта парушае прынцып «непадзельнасьці бясьпекі». Паводле яе слоў, гэта Расея пагражае непадзельнасьці бясьпекі, паколькі яна «ўварвалася ў Грузію, трымае войскі ў Малдове насуперак волі ўраду гэтай краіны, а таксама анэксавала Крым і ўварвалася ў Данбас».
Яна таксама выступіла за рэалізацыю менскіх пагадненьняў аб урэгуляваньні канфлікту ў Данбасе, адзначыўшы, што Расея павінна спыніць аказваць вайсковую падтрымку сэпаратыстам і вывесьці свае сілы з Украіны.
Паводле слоў Нуланд, расейскі народ «заслугоўвае бясьпекі, заслугоўвае росквіту, заслугоўвае лепшай аховы здароўя», і яму не патрэбная «вялікая вайна». «Нікому ня трэба, асабліва Расеі, каб дадому дастаўлялі загінулых у мяшках для трупаў» — двойчы за інтэрвію паўтарыла Нуланд.
ГЛЯДЗІЦЕ ТАКСАМА: Амэрыканская выведка: Расея плянуе выкарыстаць фэйкавае відэа з трупамі як падставу для ўварваньня ва ЎкраінуНамесьніца дзяржсакратара таксама заявіла, што ў ЗША амаль упэўненыя, што менавіта Расея арганізавала выцек у іспанскую газэту El País канфідэнцыйных адказаў Вашынгтону і яго саюзьнікаў на расейскія патрабаваньні так званых гарантый бясьпекі. «Пазнакі на дакумэнце былі тымі ж самымі, якія былі на перададзеным намі Расейскай Фэдэрацыі» — сказала яна. У расейскай амбасадзе ў Вашынгтоне назвалі гэтае сьцьвярджэньне «кансьпіралёгіяй».
- Сярод высунутых Расеяй патрабаваньняў было, у прыватнасьці, недапушчэньне пашырэньня NATO і адмова ЗША ад вайсковага супрацоўніцтва з Украінай. Гэтыя патрабаваньні былі адпрэчаныя. ЗША і іх саюзьнікі аднак прапанавалі Маскве правесьці перамовы па шэрагу пытаньняў, зьвязаных з гарантаваньнем бясьпекі, у тым ліку аб абмежаваньні ўзбраеньняў.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.