Кіраўніца дыпляматычнага ведамства Вялікай Брытаніі папярэдзіла ў пятніцу прэзыдэнта Расеі Ўладзіміра Пуціна і старшыню КНР Сі Цзіньпіна, што заходнія дзяржавы будуць разам змагацца за дэмакратыю супраць дыктатур, якія, паводле яе, набралі цяпер найбольшую сілу з часоў «халоднай вайны», паведамляе «Голас Амэрыкі».
Заходнія лідэры гавораць, што XXI стагодзьдзе будзе вызначацца барацьбой паміж дэмакратыямі і дзяржавамі, якія супернічаюць зь імі, такімі як Кітай і Расея, якія, па іх словах, кідаюць выклік кансэнсусу, які склаўся пасьля заканчэньня «халоднай вайны» ў вайсковых, тэхналягічных і эканамічных адносінах.
Выступаючы ў Аўстраліі, міністарка замежных спраў Вялікай Брытаніі Элізабэт Трас заявіла, што Захад павінен разам рэагаваць на глябальныя пагрозы, паглыбляць сувязі з дэмакратыямі ў Інда-Ціхаакіянскім рэгіёне і «даваць адпор глябальным агрэсарам».
Міжнародныя агрэсары «асьмялелі да нябачанага з часоў „халоднай вайны“ ўзроўню», сказала Трас, выступаючы ў сіднэйскім Інстытуце Лоўі.
«Яны імкнуцца экспартаваць дыктатуры... ва ўсім сьвеце. Вось чаму такія рэжымы, як Беларусь, Паўночная Карэя і М’янма, знаходзяць найбліжэйшых хаўрусьнікаў у Маскве і Пэкіне», — падкрэсьліла Трас.
Захад, паводле Трас, павінен супрацоўнічаць з такімі саюзьнікамі, як Аўстралія, Ізраіль, Індыя, Японія і Інданэзія, каб «даць адпор глябальным агрэсарам», асабліва ў Ціхаакіянскім рэгіёне.
«Свабоднаму сьвету час адстойваць свае пазыцыі», — дадала Трас.
На Захадзе Расею лічаць дыктатарскім клептакратычным рэжымам, які кіруецца аўтарытарным лідэрам і замяшаным у безадказных авантурах, такіх як анэксія Крыму ў 2014 годзе, спробы ўмяшаньня ў выбары ў ЗША і Эўропе, а таксама шэраг гучных шпіёнскіх і заказных забойстваў за межамі краіны.
Расейскія афіцыйныя асобы заяўляюць, што Захад прасякнуты рознагалосьсямі, ахоплены «русафобіяй» і ня мае права чытаць лекцыі Маскве пра тое, як ёй трэба дзейнічаць.
Кітайскае кіраўніцтва кажа, што Захад па-ранейшаму лічыць, што ён можа камандаваць сьветам, як у часы каляніяльных войнаў, і што Пэкін будзе вызначаць свой уласны шлях без умяшаньня замежных дзяржаў.
ГЛЯДЗІЦЕ ТАКСАМА: NATO перакідвае ў Нямеччыну брытанскую танкавую дывізію на фоне напружанасьці вакол УкраіныНа фоне абвастрэньня напружанасьці вакол Украіны Захад спрабуе вырашыць, што рабіць, калі Расея ўварвецца ў суседнюю краіну.
Трас папярэдзіла Пуціна, каб ён «устрымаўся і адступіў ад Украіны, перш чым зробіць сурʼёзную стратэгічную памылку».
Трас сказала, што «Крэмль не засвоіў урокаў гісторыі» і што «ўварваньне прывядзе толькі да жудасных... чалавечых ахвяр, як мы ведаем з савецка-афганскай вайны і канфлікту ў Чачэніі».
Больш за 15 000 савецкіх вайскоўцаў і сотні тысяч мірных жыхароў загінулі ў Афганістане з 1979 па 1989 год, калі краіна была акупаваная савецкімі войскамі.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.