Прэзыдэнт Казахстану Касым-Жамарт Такаеў выдаліў сваё паведамленьне ў твітэры аб «20 тысячах тэрарыстаў», якія нібыта напалі на Алматы.
7 студзеня Такаеў напісаў некалькі паведамленьняў у твітары, у якіх выказаўся пра масавыя пратэсты ў краіне.
Скрыншот выдаленага твіту Такаева
«Бандыты і тэрарысты былі добра падрыхтаваныя і арганізаваныя, а кіраўніцтва імі ажыцьцяўлялася са спэцыяльнага цэнтру. Некаторыя зь іх гаварылі не па-казаску. На Алматы было ўчынена сама меней шэсьць хваляў атак тэрарыстаў у агульнай колькасьці 20 тыс. Яны білі і забівалі паліцыянтаў і маладых салдат, падпальвалі адміністрацыйныя будынкі, займаліся марадэрствам у прыватных хатах і крамах, забілі некалькі грамадзян, гвалтавалі маладых жанчын. Маё меркаваньне такое: ніякіх гутарак з тэрарыстамі, мы павінны іх забіваць», — напісаў Такаеў. Увечары 8 студзеня гэты запіс ужо быў недаступны.
У нявыдаленай частцы заявы прэзыдэнта Казахстану гаворыцца, што «пратэсты прывялі да далейшай эскаляцыі гвалту па ўсёй краіне, справакаваўшы беспарадкі і напады на ўрадавыя будынкі, адміністрацыйныя ўстановы і вайсковыя базы, захоп аэрапорту Алматы, мясцовых і замежных самалётаў». «Аналіз сытуацыі паказаў, што Казахстан сутыкаецца з узброеным актам агрэсіі, добра падрыхтаваным і скаардынаваным злачынцамі і тэрарыстычнымі групамі, якія прайшлі падрыхтоўку за межамі краіны. Я загадаў пачаць контратэрарыстычную апэрацыю для ліквідацыі пагрозы нацыянальнай бясьпецы, для абароны жыцьця і маёмасьці грамадзян Казахстану», — напісаў Такаеў.
ГЛЯДЗІЦЕ ТАКСАМА: Улады Казахстану назвалі агульную лічбу ахвяраў: 164 чалавекі – а потым сказалі, што памыліліся- Напярэдадні ў сваім звароце ён дазволіў сілавікам страляць на паражэньне без папярэджаньня.
- Згодна з дадзенымі на раніцу 9 студзеня, па ўсім Казахстане затрымалі 5135 чалавек. Пры гэтым МУС паведамляе, што каля 300 узброеных людзей спрабавалі пакінуць краіну. Ведамства таксама заявіла, што сярод затрыманых ёсьць «грамадзяне суседняй дзяржавы».
- У нядзелю Такаеў звольніў двух намесьнікаў старшыні Камітэту нацыянальнай бясьпекі, паведамляе афіцыйны прэзыдэнцкі сайт. Днямі з пасады быў вызвалены кіраўнік КНБ Карым Масімаў. Пазьней стала вядома аб ягоным затрыманьні.
Пратэсты ў Казахстане
Мапа пратэстаў у Казахстане
- Пратэсты ў Казахстане пачаліся 2 студзеня ў горадзе нафтавікоў Жанаэзене пасьля таго, як улады ўдвая павысілі цану на звадкаваны газ. Першапачаткова пратэстоўцы патрабавалі толькі зьнізіць цану.
- 4 студзеня пратэсты сталі масавымі і перайшлі ў сутычкі з паліцыяй. Пратэстоўцы запатрабавалі адстаўкі ўраду і сыходу з палітыкі былога прэзыдэнта Казахстану Нурсултана Назарбаева. Яны скандавалі «Шал, кет!» («Стары, сыходзь!»).
- Падчас сутычак сілавікі ўжывалі сьвятлашумавыя гранаты, сьлезацечны газ. Адбываліся перастрэлкі. Пратэстоўцы ўзброіліся арматурай, палкамі, камянямі. Яны білі паліцыю, падпальвалі аўтамабілі. Частка сілавікоў, як у горадзе Актаў, перайшла на бок пратэстоўцаў.
- Пратэсты закранулі амаль усю краіну: горад нафтавікоў Жанаэзен і цэнтар Мангыстаўскай вобласьці Актаў (адкуль пачаліся пратэсты), былую сталіцу краіны і найбуйнейшы горад краіны Алматы, цяперашнюю сталіцу Нур-Султан (былую Астану), буйныя гарады Шымкент, Караганду і Актэбе, а таксама многія іншыя гарады і мястэчкі.
- Ранкам 5 студзеня прэзыдэнт краіны Касым-Жамарт Такаеў адправіў урад у адстаўку.
- Надзвычайнае становішча ўвялі ва ўсёй краіне. У Нур-Султане, Алматы, Мангыстаўскай вобласьці ўвялі камэнданцкі час.
- Эпіцэнтрам пратэстаў стаў горад Алматы.
- 5 студзеня пратэстоўцы ўварваліся ў акімат Алматы, захапілі былую прэзыдэнцкую рэзыдэнцыю, разграмілі будынак з офісам кіруючай партыі «Нур-Отан». У будынку акімату і пракуратуры Алматы, а таксама былой рэзыдэнцыі пачаўся пажар. Пратэстоўцы захапілі і разграмілі будынак тэлеканала «Мир24» і яшчэ некалькіх тэлеканалаў. Завалодалі будынкам Камітэту нацыянальнай бясьпекі ў Алматы.
- Увечары 5 студзеня пратэстоўцы захапілі аэрапорт у Алматы.
- У Алматы шмат разгромленых будынкаў, крамаў, спаленых аўтамабіляў.
- 5 студзеня ва ўсёй краіне адключылі правадны інтэрнэт і галасавую сувязь, дагэтуль блякавалі мабільны інтэрнэт. Спынілі вяшчаньне буйныя тэлеканалы Казахстану.
- Пачаліся страйкі. Спынілі вытворчасьць мэталюргічныя заводы ў горадзе Балхаш, нафтагазавае прадпрыемства «Мангыстаўмунайгаз» у Мангыстаўскай вобласьці.
- 5 студзеня прэзыдэнт краіны Такаеў заявіў, што ўзначаліць Раду бясьпекі Казахстану замест Назарбаева, і паабяцаў дзейнічаць «максымальна жорстка». Назарбаеў пайшоў у адстаўку. У горадзе Талдыкарган пратэстоўцы павалілі помнік Назарбаеву.
- Пратэстоўцы запатрабавалі таксама сыходу з пасады Такаева.
- У ноч на 6 студзеня Такаеў запрасіў дапамогі ў АДКБ.
- 6 студзеня першыя вайскоўцы ў межах місіі АДКБ прыбылі ў Казахстан.
- На 6 студзеня казаскія мэдыя паведамілі пра дзясяткі забітых сярод цывільнага насельніцтва, 18 ахвяраў сярод сілавікоў, параненыя 748 праваахоўнікаў. Вярхоўны камісар ААН заявіў пра прыкладна тысячу параненых чалавек толькі ў Алматы.
- 6 студзеня МУС Казахстана паведаміла пра 2298 затрыманых. Тым часам на афіцыйным узроўні Астану перасталі называць Нур-Султанам, як назвалі горад у гонар дыктатара Назарбаева.
- 7 студзеня Міністэрства ўнутраных спраў Казахстану паведаміла, што падчас так званай «зачысткі» ў самым буйным горадзе краіны, Алматы, загінулі 26 «узброеных злачынцаў», яшчэ 18 атрымалі раненьні, а ўсе адміністрацыйныя будынкі ў гарадах Казахстану «вызваленыя і ўзятыя пад узмоцненую ахову».
- Таксама ў выніку «сутыкненьня з хуліганскім натоўпам» параненыя 216 вайскоўцаў Нацыянальнай гвардыі ў Алматы і Шымкенце, паведаміла прэс-служба вайсковага фармаваньня.
- Раніцай 7 студзеня прэзыдэнт Казахстану Касым-Жамарт Такаеў на пасяджэньні контратэрарыстычнага штабу заявіў, што «ў значнай ступені наведзены канстытуцыйны лад ва ўсіх рэгіёнах краіны».
- Пазьней 7 студзеня Такаеў выступіў са зваротам да грамадзянаў краіны, у якім заявіў, што даў загад праваахоўным органам і войску адкрываць агонь на паражэньне без папярэджаньня.
- 9 студзеня Такаеў выдаліў свой твіт пра тое, што на Казахстан нібыта напалі 20 тысяч тэрарыстаў, але на наступны дзень сказаў, што «ў агрэсіі супраць Казахстану ўдзельнічалі баявікі з цэнтральнаазіяцкіх краінаў, Афганістану і Блізкага Ўсходу».
- У той жа дзень стала вядома пра дзьве сьмерці: кіраўніка абласной паліцыі і палкоўніка камітэту нацбясьпекі.
- Паводле расьсьледаваньня The Telegraph, малодшая дачка Назарбаева вывела з Казахстану 300 мільёнаў даляраў і патраціла частку грошай на нерухомасьць за мяжой.
- Раніцай 11 студзеня Такаеў заявіў, што кантынгент АДКБ пачнуць выводзіць з Казахстану праз 2 дні. Ён запэўніў Мажыліс у тым, што ўлады ўсё вярнулі пад кантроль.