У свой дзень народзінаў Ніна Багінская выйшла на вуліцы Менску з плякатам «Свабоду палітвязьням», але неўзабаве яе затрымалі, паведамляе «Белсат».
«Яны выклікалі хуткую дапамогу, завезьлі ў Навінкі. У Навінках я ня першы раз, далі толькі паперку падпісаць, што я не адчуваю патрэбы ў лячэньні, што я псыхічна здаровы чалавек. Я села на 18-ы аўтобус і прыехала дахаты», — распавяла Ніна Багінская.
Таксама міліцыянты склалі на Ніну Багінскую пратакол.
Спадарыня Ніна сказала сілавікам, што напярэдадні быў таксама юбілей палітвязьня Паўла Севярынца, які, як і мноства людзей, сядзіць за кратамі, а таму неабходна патрабаваць вызваленьня палітвязьняў.
ГЛЯДЗІЦЕ ТАКСАМА: Ніна Багінская расказвае пра сваё знакамітае паліто, якому 100 год. ВІДЭА ГЛЯДЗІЦЕ ТАКСАМА: Шматдзетныя маці, журналісткі, пэнсіянэркі: жанчыны ў няволі, зь якімі нібыта «не ваюе» Лукашэнка ГЛЯДЗІЦЕ ТАКСАМА: Удзельніцы жаночых маршаў, Ціханоўская, Багінская... Выбралі жанчын 2020 годуШто трэба ведаць пра Ніну Багінскую
«Чалавек-сьцяг» — 75-гадовая пэнсіянэрка Ніна Багінская стала адным з сымбаляў беларускіх пратэстаў ня толькі 2020 году, але і ўсяго дзесяцігодзьдзя.
- Да беларускага нацыянальна-дэмакратычнага руху яна далучылася яшчэ ў 1988 годзе, калі на Дзяды выйшла на марш у Курапаты.
- Расла ў сям’і гарадзкой інтэлігенцыі, бацькі мелі беларускамоўных сяброў, расказвалі пра рэпрэсіі 1930-х.
- Працавала чарцёжніцай у Інстытуце геалёгіі, займалася веласпортам.
- Багінская — нязьменная ўдзельніца шматлікіх акцый пратэсту цягам многіх гадоў. Яе дзясяткі разоў затрымлівалі, яна ня раз начавала ў ізалятарах.
- Яна адна з рэкардсмэнаў па колькасьці штрафаў — больш за 16 тысяч даляраў, якія яна прынцыпова адмаўляецца плаціць. За гэта ў яе апісалі два лецішчы і штомесяц забіраюць палову пэнсіі.
- Ня мае мабільнага тэлефона, не карыстаецца інтэрнэтам, не глядзіць тэлевізар з прычыны кепскага зроку. Затое выпісвае незалежныя газэты.
- Усе сьцягі, зь якімі выходзіць на пратэсты, шые сама. Пашыла ўжо сотні сьцягоў. Многія зь іх міліцыя пазабірала пры затрыманьнях.
- Лічыць, што трэба перамагаць негвалтоўна, бяз зброі ў руках. Увесь час намагаецца размаўляць зь сілавікамі, прысаромліваць іх і тлумачыць, у чым яны ня маюць рацыі.
- Словы актывісткі амапаўцу «Я гуляю» сталі лёзунгам мірных пратэстаў і інтэрнэт-мэмам.
- Сама Багінская стала мастацкім вобразам і крыніцай натхненьня для мастакоў, якія адлюстроўваюць сучасныя падзеі ў Беларусі.
- У верасьні 2020 году фатаздымкі актывісткі апублікаваў вядомы італьянскі часопіс пра моду Vogue.
- Паводле актывісткі, сымбалем пратэстаў яе зрабілі журналісты і самі пратэстоўцы, найперш моладзь.
- У кастрычніку, камэнтуючы пратэсты, Аляксандар Лукашэнка загадаў «не забіраць Багінскую з плошчаў», назваў яе перакананым чалавекам. Пасьля гэтага актывістку некалькі разоў затрымлівалі, але адпускалі без пратаколаў.
- Мае двух дзяцей, унукаў і праўнукаў.