Ігар Лосік у турме вучыцца маляваць
Жонка палітвязьня журналіста Свабоды Ігара Лосіка Дар’я Лосік у сераду была на спатканьні з мужам у гомельскім СІЗА. Дарʼя паведаміла ў Інстаграм, што Ігар за кратамі вучыцца маляваць партрэты. Яна заклікае дасылаць Ігару свае фота на аркушы паперы А4, а ён у адказ прышле маляваны партрэт.
Раней Ігар Лосік прыслаў у сям’ю свой партрэт, намаляваны сукамэрнікам пасьля двух тыдняў ягонай галадоўкі пратэсту ў Жодзінскім СІЗА.
Партрэт Ігара Лосіка, зроблены ягоным сукамернікам пасьля двух тыдняў галадоўкі пратэсту.
ГЛЯДЗІЦЕ ТАКСАМА: «Баюся, што дачка забудзе мой твар». Што Ціханоўскі, Лосік, Статкевіч, Цыгановіч пісалі з турмыІгару Лосіку прысудзілі 15 гадоў пазбаўленьня волі ўзмоцненага рэжыму па «справе Ціханоўскага». За картамі палітвязень знаходзіцца ўжо 551 дзень.
Даслаць фота Ігару можна па адрасе: СІЗА-3, 246003, г. Гомель, вул. Кніжная, 1А, Ігару Аляксандравічу Лосіку.
ГЛЯДЗІЦЕ ТАКСАМА: «Шалёная жорсткасьць беларускай судовай сыстэмы». «Рэпартэры бяз межаў» запатрабавалі вызваліць Лосіка і ПальчысаКрымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.