ЗША і Вялікая Брытанія пашырылі санкцыі адносна Беларусі

У дакумэнце, апублікаваным на сайце амэрыканскага казначэйства, пералічаныя 20 фізычных асобаў і 12 прадпрыемстваў і ўстановаў, а таксама тры самалёты, на якія пашыраныя санкцыі ЗША.

Новыя санкцыі ўведзеныя адносна наступных асобаў:

Аляксандар Алёкса – намесьнік начальніка 3-га ўпраўленьня ГУБАЗіК.

Дзьмітры Баскаў – чалец Савету Рэспублікі, былы старшыня Фэдэрацыі хакею.

Міхаіл Бедункевіч – намесьнік кіраўніка ГУБАЗіК.

Ігар Буткевіч — намесьнік кіраўніка Памежнага камітэту.

Дзяніс Чамаданаў – намесьнік начальніка 2-га ўпраўленьня ГУБАЗіК.

Ігар Гутнік – начальнік Берасьцейскай ахоўнай памежнай групы.

Дзьмітры Карсюк – судзьдзя Цэнтральнага раёну Менску.

Дзьмітры Ковач — начальнік 1-га аддзелу ГУБАЗіК.

Анатоль Лапо – кіраўнік Памежнага камітэту.

Алег Ларын — начальнік 5-га ўпраўленьня ГУБАЗіК.

Дзьмітры Лукашэнка – старшыня Прэзыдэнцкага спартовага клюбу.

Андрэй Макарэвіч — начальнік 2-га аддзелу 1-га ўпраўленьня ГУБАЗіК.

Канстанцін Маластаў – начальнік Горадзенскага памежнага атраду.

Андрэй Паршын – кіраўнік ГУБАЗіК.

Сяргей Новікаў — біятляніст, начальнік упраўленьня спорту Магілёўскага аблвыканкаму.

Ігар Печань — намесьнік кіраўніка Памежнага камітэту.

Раман Подлінеў – намесьнік кіраўніка Памежнага камітэту.

Васіль Сысоеў – кіраўнік камітэту па сельскай гаспадарцы і харчаваньні Менскага аблвыканкаму.

Уладзімер Вашкевіч – намесьнік начальніка 4-га аддзелу 2-га ўпраўленьня ГУБАЗіК.

Аляксандар Жыўлюк — супрацоўнік ГУБАЗіК.

Пад санкцыі падпалі прадпрыемствы «Агат — Электрамэханічны завод», Белтэхэкспарт, Слаўкалій, 140-ы рамонтны завод, Трансавіяэкспарт, Беларуская калійная кампанія, ААТ «Пеленг», Цэнтракурорт, а таксама Прэзыдэнцкі спартовы клюб.

ГЛЯДЗІЦЕ ТАКСАМА: Дзяржсакратар ЗША: Злучаныя Штаты разам з Эўразьвязам рыхтуюць новыя санкцыі супраць рэжыму Лукашэнкі

Вялікая Брытанія ўвяла санкцыі адносна кіраўніка ГУБАЗіКу Андрэя Паршына, судзьдзі Натальлі Бугук, пракуроркі Аліны Касьянчык і шэрагу прапагандыстаў: Сяргея Гусачэнкі, Людмілы Гладкай, Андрэя Мукавозчыка, Андрэя Крывашэева і Грыгорыя Азаронка.

Таксама брытанскія эканамічныя санкцыі былі распаўсюджаныя на «Беларуськалій».

Навіна абнаўляецца.

Што варта ведаць пра санкцыі ЗША

Першыя санкцыі, якія ўвяла адміністрацыя прэзыдэнта Джорджа Буша пасьля прэзыдэнцкіх выбараў у Беларусі ў 2006 годзе, прадугледжвалі блякаваньне ўласнасьці і актываў групы высокіх чыноўнікаў, уключна з Аляксандрам Лукашэнкам. Санкцыі распаўсюджваліся таксама і на сем’і гэтых чыноўнікаў. Ім таксама забаранілі ўезд на тэрыторыю ЗША.

Пазьней асобам, у тым ліку і новым, якія папоўнілі сьпісы, забаранілі мець актывы на тэрыторыі ЗША і весьці бізнэс з амэрыканскімі партнэрамі.

Пасьля прэзыдэнцкіх выбараў у Беларусі напрыканцы 2010 году ЗША пашырылі сьпіс беларускіх чыноўнікаў, якім забаронены ўезд у ЗША. Акрамя таго, грамадзянам ЗША забаранілі весьці бізнэс зь дзяржаўным канцэрнам «Белнафтахім» і шэрагам іншых прадпрыемстваў. Гэтак Злучаныя Штаты адрэагавалі на рэпрэсіі пасьля выбараў, у тым ліку на зьняволеньне шэрагу кандыдатаў у прэзыдэнты.

Пра якія беларускія прадпрыемствы ідзе гаворка

«Белнафтахім»,
«Белнафтахім ЗША»,
«Нафтан»,
«Беларускі нафтавы гандлёвы дом»,
«Белшына»,
«Гродна Азот»,
«Гроднахімвалакно»,
ААТ «Лякафарба»,
ААТ «Полацак-Шкловалакно».

Прадпрыемствам i грамадзянам ЗША было забаронена ўступаць у эканамічныя і фінансавыя дачыненьні з гэтымі арганізацыямі, а ўся іх маёмасьць і рахункі, якія знаходзяцца на тэрыторыі ЗША, былі замарожаныя. Да таго ж многія краіны і кампаніі адмаўляюцца працаваць з прадпрыемствамі, якія знаходзяцца пад санкцыямі ЗША.

У кастрычніку 2015 году Міністэрства фінансаў ЗША прыпыніла санкцыі супраць гэтых дзевяці беларускіх прадпрыемстваў у сувязі з «пэўным прагрэсам у сфэры дэмакратыі і правоў чалавека», а таксама з мэтай падтрымкі незалежнасьці і сувэрэнітэту Беларусі.
Пасьля прэзыдэнцкіх выбараў у Беларусі ў жніўні 2020 году і рэпрэсій, якія адбыліся пасьля іх, ЗША аднавілі санкцыі ад 3 чэрвеня 2021 году. Адпаведнае рашэньне 19 красавіка 2021 году апублікавала Міністэрства фінансаў ЗША. Злучаныя Штаты дабіваюцца вызваленьня ўсіх палітвязьняў.