Зяленскі заявіў, што расейцы плянуюць пераварот ва Ўкраіне пры дапамозе мільярдэра Ахметава

«У нас ёсьць ня толькі агентурная, але і гукавая інфармацыя, дзе, скажам так, прадстаўнікі Ўкраіны з прадстаўнікамі Расеі абмяркоўваюць удзел Рыната Ахметава ў дзяржаўным перавароце ва Ўкраіне. Што будзе выкарыстаны адзін мільярд даляраў і гэтак далей», — заявіў Уладзімір Зяленскі на прэс-маратоне ў Кіеве 26 лістапада.

На гэтую падзею змаглі трапіць прадстаўнікі 30 украінскіх і замежных СМІ, якія атрымалі адпаведнае запрашэньне. Папярэдняя акрэдытацыя журналістаў не праводзілася, а сама падзея не анансавалася.

У той жа час украінскі прэзыдэнт мяркуе, што Рыната Ахметава «ўцягваюць у вайну супраць дзяржавы Ўкраіны».

«Лічу, што ён распачаў яе. Лічу, што гэта ягоная вялікая памылка, таму што нельга ваяваць супраць свайго народу і супраць прэзыдэнта, якога выбраў народ Украіны», — дадаў ён.

Уладзімір Зяленскі прапанаваў Рынату Ахметаву прыйсьці ў Офіс прэзыдэнта, каб паслухаць аўдыёзапісы размоў, якія нібыта перахапілі спэцыяльныя службы.

«Лічу, што гэтую інфармацыю мае ведаць украінскае грамадзтва. І яшчэ хачу сказаць, што я не Януковіч. І нікуды ўцякаць не зьбіраюся. І не Парашэнка. На гібелі людзей, Нябеснай сотні... і на бульдозер вылазіць ня буду», — падкрэсьліў прэзыдэнт Украіны.

«Цяпер мне гэта нагадвае сытуацыю на расхістваньне, таму што стабільная сытуацыя ва Ўкраіне нікому не патрэбна. Патрэбна сытуацыя толькі людзям».

Ва Ўкраіне апошні месяц актыўна абмяркоўвацца энэргетычны крызіс і роля Рыната Ахметава ў яго стварэньні. Гэтаму бізнэсоўцу належаць большая частка так званай «зялёнай» энэргетыкі, а таксама цеплаэлектрастанцый, якія працуюць на вугалі і якія не падрыхтаваліся да новага ацяпляльнага сэзону, не закупіўшы ў неабходных аб’ёмах вугальнае паліва.

Апроч таго, кампаніі Рыната Ахметава займаліся пастаўкамі беларускай электраэнэргіі. Экспэрты не выключалі, што гэтыя дзеяньні маглі быць узгодненыя з Расеяй.