Нядаўна зь ім сустрэўся былы ягоны прыхільнік Юры Васкрасенскі, які перайшоў на бок Лукашэнкі. Ён расказаў «Нашай Ніве», што Бабарыку павысілі месячны заробак з 1 рубля 60 капеек да 50 рублёў.
Цяпер Васкрасенскі займаецца пасярэдніцтвам у справе «амністыі» палітвязьняў узамен на пісьмовыя пакаяньні. Пакуль камісія ўхваліла памілаваньне толькі 13 чалавек. У калёніі ён угаворваў Бабарыку папрасіць памілаваньня і пачаць кампэнсаваць шкоду (а гэта больш за 46 мільёнаў рублёў).
Падчас выбарчай кампаніі 2020 году Юры Васкрасенскі зьбіраў подпісы за Віктара Бабарыку. 12 жніўня яго затрымалі і зьмясьцілі ў СІЗА КДБ паводле абвінавачаньня ў арганізацыі масавых беспарадкаў. Яму пагражала да 8 гадоў зьняволеньня. 11 кастрычніка Васкрасенскі быў адным з удзельнікаў сустрэчы з Лукашэнкам у СІЗА. 12 кастрычніка яго вызвалілі.
Тым часам у калёніі зь Віктарам Бабарыкам іншым зьняволеным не дазваляюць нават размаўляць: тых, хто падышоў павітацца, адразу адправілі ў ШЫЗА, паведаміў у лісьце сваякам палітвязень Максім Тужык.
Сёлета ў ліпені былога старшыню Белгазпрамбанку і прэтэндэнта на ўдзел у прэзыдэнцкіх выбарах Віктара Бабарыку асудзілі на 14 гадоў калёніі ўзмоцненага рэжыму за хабар і адмываньне грошай.
ГЛЯДЗІЦЕ ТАКСАМА: «Зь Віктарам Бабарыкам не дазваляюць нават гаварыць». Былы студэнт не атрымаў адказу на прашэньне аб памілаваньніПалітвязьнямі прызналі яшчэ трох чалавек
Як паведамляе пазбаўлены рэгістрацыі ПЦ «Вясна», беларускія праваабаронцы прызналі палітвязьнямі яшчэ трох чалавек:
Міхаіла Хаванскага, які 3 верасьня асуджаны паводле арт. 364 КК за гвалт у дачыненьні да супрацоўніка органаў унутраных справаў да аднаго году пазбаўленьня волі ў папраўчай калёніі;
Генадзя Сьмірнова, які 27 кастрычніка асуджаны паводле ч. 2 арт. 363 і 368 КК за супраціўленьне супрацоўніку органаў унутраных справаў і абразу прэзыдэнта да двух гадоў і шасьці месяцаў пазбаўленьня волі ў папраўчай калёніі;
Галіну Гарацкевіч, якая 16 жніўня асуджаная паводле арт. 342 і 364 КК за ўдзел у мірным сходзе і супраціўленьне гвалту пры яго разгоне да трох гадоў абмежаваньня волі ў папраўчай установе адкрытага тыпу.
Праваабаронцы адзначылі непрапарцыйна жорсткія прысуды судоў па палітычна матываваных справах.
На сёньняшні дзень палітвязьнямі ў Беларусі прызналі 876 чалавек.