Беларускія вайскоўцы дастаўляюць кісларод з авіяцыйных базаў Вайскова-паветраных сіл і войскаў супрацьпаветранай абароны, дзе ёсьць адпаведнае абсталяваньне, паведамляе Міністэрства абароны Беларусі.
Пры неабходнасьці дадатковыя крыніцы дапамогуць забясьпечыць бесьперабойную працу бальніц.
«За адну працоўную кампанію мы здабываем каля 25 тысяч літраў вадкага кіслароду. Працэс на самай справе даволі працаёмкі, цяжкі за кошт таго, што ў атмасфэрным паветры ўтрыманьне кіслароду вельмі маленькае, а тэмпэратура яго кіпеньня павінна быць −183 °C. Задзейнічана вельмі шмат абсталяваньня», — распавёў Начальнік тэхнічнага разьліку газазабесьпячэньня авіяцыйнай базы ВПС і войскаў СПА Ўладзімер Лазоўскі.
Паводле яго, вайскоўцы здабываюць выключна мэдыцынскі кісларод з чысьцінёй ня менш за 99,5%.
Нядаўна буйное беларускае прадпрыемства, якое выпускае прадукты падзелу паветра, ААТ «Крыён» перайшло на вытворчасьць выключна мэдыцынскага кіслароду. Кожныя суткі там вырабляюць 200 тон мэдыцынскага кіслароду і столькі ж адгружаюць бальніцам. Дадатковыя магутнасьці па вытворчасьці кіслароду разгарнулі на «СьветлагорскХімвалакно», «Гродна-Азоце», «Нафтане».
ГЛЯДЗІЦЕ ТАКСАМА: Прадпрыемства вытворчасьці мэдычнага кіслароду ў Менску працуе пры поўнай загрузцы, — дырэктар ГЛЯДЗІЦЕ ТАКСАМА: «Калі б людзі бачылі рэальную статыстыку, ставіліся б сур’ёзьней». Як каранавірус атакаваў інвалідаў, пэнсіянэраў і цяжарных ГЛЯДЗІЦЕ ТАКСАМА: Усё забірае шпіталь. Сьветлагорскае «Хімвалакно» паведаміла пакупнікам, што больш ня можа прадаваць ім кісларод