Кіраўнік МЗС Расеі Сяргей Лаўроў заявіў, што яго краіна з 1 лістапада прыпыняе працу пастаяннага прадстаўніцтва РФ пры NATO.
Інфармацыйнае бюро NATO ў Маскве таксама спыніць сваю дзейнасьць.
Такое рашэньне Расея прыняла ў якасьці мер у адказ пасьля рашэньня NATO аб высылцы васьмі расейскіх супрацоўнікаў і скасаваньні дзьвюх пасад у пастаянным прадстаўніцтве РФ пры альянсе ў Брусэлі з прычыны «зламысных дзеяньняў Расеі». У выніку колькасьць місіі была скарочаная з 20 да 10 чалавек.
ГЛЯДЗІЦЕ ТАКСАМА: NATO пазбавіў акрэдытацыі 8 супрацоўнікаў расeйскай місіі пры альянсеАфіцыйны прадстаўнік NATO тады сказаў, што высланыя супрацоўнікі прадстаўніцтва былі афіцэрамі расейскай выведкі.
«Палітыка NATO ў дачыненьні да Расеі застаецца пасьлядоўнай. Мы ўзмацнілі стрымліваньне і абарону ў адказ на агрэсіўныя дзеяньні Расеі і ў той жа час застаёмся адкрытымі для канструктыўнага дыялёгу», — заявіў афіцыйны прадстаўнік NATO.