Саўле Амарава, намінаваная прэзыдэнтам Байдэнам на пасаду кіраўніка Упраўленьня фінансавага кантролю ЗША, павінна паказаць сэнатарам сваю дыплёмную працу, напісаную ў бытнасьць яе студэнткай Маскоўскага дзяржаўнага ўнівэрсытэту. На гэтым настойвае член сэнацкага камітэту ў справах банкаў сэнатар-рэспубліканец Пэт Тумі.
Як паведамляе газэта Washington Examiner, сэнатар Тумі накіраваў Саўле Амаравай ліст з просьбай прадставіць гэтую працу да пачатку слуханьняў аб яе кандыдатуры ў Сэнаце. Праца, напісаная ў 1989 годзе, называлася «Эканамічны аналіз Карла Маркса і тэорыя рэвалюцыі ў „Капітале“». Амарава была ленінскай стыпэндыяткай. Яна імігравала з Савецкага Саюзу ў Злучаныя Штаты ў 1991 годзе, абараніла доктарскія дысэртацыі ва ўнівэрсытэце Вісконсіна і Паўночна-Заходнім унівэрсытэце і цяпер выкладае права ў Карнэльскім унівэрсытэце.
ГЛЯДЗІЦЕ ТАКСАМА: У ЗША падтрымалі новыя санкцыі ў дачыненьні да дзярждоўгу Расеі. Якія будуць наступствыКандыдатура Саўле Амаравай выклікала асаблівую ўвагу, паколькі яна вядомая сваімі нетрадыцыйнымі поглядамі на ролю банкаўскай сыстэмы ў Злучаных Штатах. Яна прапануе заснаваць дзяржаўнае ўпраўленьне інвэстыцый, якое будзе ствараць «доўгатэрміновую нацыянальную стратэгію эканамічнага разьвіцьця і рэканструкцыі», і перадаць Фэдэральнай рэзэрвовай сыстэме амаль поўны кантроль над амэрыканскай фінансавай сыстэмай аж да права кантраляваць цэны сыстэмна важных фінансавых актываў і ўзровень заработнай платы ў краіне з мэтай «дэмакратызацыі фінансаў».
Крытыкі Саўле Амаравай таксама зьвяртаюць увагу на некаторыя зь яе запісаў у твітэры, дзе яна станоўча ацэньвае савецкі досьвед. Напрыклад, піша пра тое, што ў Савецкім Саюзе не было розьніцы ў заробках жанчын і мужчын.
Until I came to the US, I couldn%27t imagine that things like gender pay gap still existed in today%27s world. Say what you will about old USSR, there was no gender pay gap there. Market doesn%27t always "know best." https://t.co/vvnx9DZICN
— Saule Omarova (@STOmarova) March 31, 2019
Пэт Тумі характарызуе гэтыя ідэі як «вельмі лявацкія». Сэнатары зь лібэральнага крыла Дэмакратычнай партыі віталі кандыдатуру Саўле Амаравай. «Яна будзе бясстрашным абаронцам спажыўцоў», — заявіла сэнатар-дэмакрат Элізабэт Уорэн.
Для зацьвярджэньня кандыдатуры на пасаду міністраў і кіраўнікоў асноўных дзяржаўных ведамстваў патрабуецца простая большасьць галасоў сэнатараў.