Але самі беларусы, піша «Настоящее время», да статыстыкі ведамства ставяцца зь недаверам. Яны добра памятаюць, як у пачатку эпідэміі адміністрацыя Лукашэнкі спачатку наогул не прызнавала наяўнасьць COVID-19 у краіне, потым праваліла забесьпячэньне мэдыкаў ахоўнымі касьцюмамі і маскамі (гэтую функцыю ўзялі на сябе валянтэры) і, нарэшце, адмаўлялася рэгулярна публікаваць інфармацыю пра колькасьць заражаных і памерлых.
ГЛЯДЗІЦЕ ТАКСАМА: Мінздароўя: за ўвесь час пандэміі ад каранавірусу ў Беларусі памерлі 4200 пацыентаўСёньня, праз паўтара года, улады Беларусі называюць сытуацыю з ковідам у краіне «кантраляванай» і заклікаюць насельніцтва да бясплатнай вакцынацыі. Але самі беларусы расказваюць пра доўгія чэргі у паліклініках, месцамі катастрафічны недахоп лекараў і перапоўненыя шпіталі. Усё больш людзей лічаць, што барацьбу з эпідэміяй улады правалілі.
Сёньня чэргі ў беларускія паліклінікі зьбіраюцца яшчэ за некалькі гадзін да адкрыцьця. Часам пацыентам з сымптомамі каранавірусу не хапае месцаў у калідорах паліклінік і людзі нават з тэмпэратурай вымушаныя чакаць сваёй чаргі на вуліцы. Жыхар Берасьця Вадзім Барысевіч, які нядаўна перахварэў на ковід, расказвае пра стомленасьць лекараў, якія яму дапамагалі:
«Такая атмасфэра... адчуваецца, што яны працуюць на мяжы, відаць, што яны стамляюцца, — апавядае Вадзім. — Таму што гэты „даўрачэбны“ кабінэт працуе з 8 раніцы да 7 вечара ўвесь дзень, а людзі ідуць нон-стоп. Яны ідуць, ідуць, ідуць...»
ГЛЯДЗІЦЕ ТАКСАМА: «Ковід вылечылі, але ўзьніклі іншыя ўскладненьні». Лідэр прадпрымальнікаў Шумчанка трапіў у рэанімацыюМэдыкі чэргі ў паліклініках тлумачаць недахопам пэрсаналу. Лекары масава звальняюцца і зьяжджаюць зь Беларусі пасьля першай хвалі ковіду, калі ўлады не прызнавалі пандэміі і забаранялі ім расказваць аб праблемах, зь якімі яны сутыкаліся. Нямала мэдыкаў таксама сталі ахвярамі рэпрэсій пасьля прэзыдэнцкіх выбараў з прычыны ўдзелу ў пратэстах супраць рэжыму Лукашэнкі.
«Не хапае лекараў, не хапае сярэдняга мэдпэрсаналу ў шпіталях, якія разгортваюцца пад каранавірусных пацыентаў, — расказвае лекар-рэаніматоляг зь Віцебску Расьціслаў Савіцкі. — Даходзіць да таго, што лекараў з паліклінік перакідваюць на працу ў стацыянары, бо не хапае менавіта працоўных рук. З гэтай прычыны ствараецца дэфіцыт лекараў у паліклініках, што, у прынцыпе, таксама ніяк станоўча не адбіваецца на сытуацыі ў краіне ў цэлым».
ГЛЯДЗІЦЕ ТАКСАМА: У футбольнай зборнай Беларусі тры трэнэры захварэлі на COVID-19Мянчанка Кацярына кажа, што ёй таксама давялося звольніцца з мэдычнага цэнтру. Яна брала ўдзел у адной з акцый пратэсту і падняла зь зямлі бел-чырвона-белы сьцяг. Дзяўчыну затрымалі і адправілі на 10 сутак у ізалятар. Кацярына зьехала зь Беларусі ва Ўкраіну і цяпер працуе ў мэдычным цэнтры ў Кіеве. Вяртацца дадому, як і тысячы іншых актывістаў, якія выехалі, яна не зьбіраецца.
«Шпіталі ў Беларусі перапоўненыя, мэдычных работнікаў стала менш: гэта я ведаю з размоваў былых калег, — кажа Кацярына. — Вельмі складана там становіцца працаваць. Заробкі робяцца меншыя. Усё б нічога, але калі ты працуеш на дзяржаву, ты аддаеш падаходны падатак на добрую дзяржаву. А на што аддаём мы? На турмы, у якіх няма умоў? На армію, якая павінна абараняць свой народ, але яна не абараніла нас?»
ГЛЯДЗІЦЕ ТАКСАМА: Moderna супраць Pfizer: якая вакцына лепшаяЗахварэлыя на COVID-19 у Беларусі пацьвярджаюць, што сутыкаюцца ня толькі з чэргамі ў паліклініках, але і з бракам свабодных месцаў у шпіталях. Мянчанка Бася Пучынская расказала, што для таго, каб пакласьці хворага на ковід бацьку на ШВЛ, зь Менскага раёну яго давялося везьці за 140 кілямэтраў у горад Мядзел.
«Апарат яму ў выніку не спатрэбіўся, на шчасьце, але ён увесь час ляжыць з кіслароднай маскай, — кажа Бася Пучынская. — І, наколькі я ведаю, там сытуацыя таксама ня вельмі. Там у шпіталі людзі ляжаць абсалютна з розных месцаў Беларусі. Дзе знайшлі месца, туды і прывезьлі».
ГЛЯДЗІЦЕ ТАКСАМА: Нямеччына абвясьціла Беларусь і Літву зонамі падвышанай рызыкі па COVID-19. Што гэта азначае для беларусаўНават калі верыць афіцыйным дадзеным Міністэрства аховы здароўя Беларусі, цяпер у краіне назіраецца рэкордная колькасьць тых, хто захварэў з моманту пачатку пандэміі: COVID-19 фіксуецца ў амаль 2 тысяч чалавек за суткі. Але чыноўнікі сытуацыю з каранавірусам называюць «кантраляванай» і заклікаюць беларусаў вакцынавацца.
«Вакцын у нас цяпер больш чым дастаткова. І ніякіх перабояў нават не прадугледжваецца», — запэўнівае міністар аховы здароўя Беларусі Дзьмітры Піневіч.
ГЛЯДЗІЦЕ ТАКСАМА: Ад каранавірусу памёр бацька палітвязьня Паўла СевярынцаАле беларусы не сьпяшаюцца прышчапляцца нават бясплатнай вакцынай. І лекары кажуць, што на гэта ёсьць прычыны.
«Часцей за ўсё прапануецца вакцына, якая разьліваецца ў нас, у Беларусі. Гэта той жа самы „Спутник“, але ён вырабляецца ў нас у краіне. І да гэтай вакцыны даверу няма нават сярод лекараў і сярод, у тым ліку, высокапастаўленых чыноўнікаў, — тлумачыць Расьціслаў Савіцкі, лекар-рэаніматоляг зь Віцебску. — Таму што яны часьцей за ўсё робяць прышчэпкі сабе арыгінальным „Спутником“, расейскай вытворчасьці, альбо кітайскай вакцынай. І гэта выклікае пытаньне: а чаму тады ўсім астатнім прапануюць толькі такі варыянт?».
Альтэрнатывай для беларусаў можа стаць якасная эўрапейская вакцына, кажа Франак Вячорка, дарадца палітыка Сьвятланы Ціханоўскай. Але, паводле яго, усё ўпіраецца ў нежаданьне беларускіх уладаў нават абмяркоўваць падобныя пастаўкі.