Палітвязьні

Арышт філёзафа Мацкевіча працягнулі на месяц, яго паплечнікі вядуць у Фэйсбуку прысьвечаную яму старонку

Уладзімер Мацкевіч, архіўнае фота

Філёзафу і мэтадолягу Ўладзімеру Мацкевічу падоўжылі тэрмін знаходжаньня пад вартай яшчэ на месяц.

Такім чынам, ён прабудзе за кратамі сама меней да 4 лістапада. Праваабаронцы прызналі яго палітычным зьняволеным.

Уладзімера Мацкевіча арыштавалі сёлета на пачатку жніўня. Яго абвінавачваюць у арганізацыі і падрыхтоўцы дзеяньняў, якія груба парушаюць грамадзкі парадак.

ГЛЯДЗІЦЕ ТАКСАМА: Уладзімер Мацкевіч даў інтэрвію зь СІЗА: «Чыноўнікі і сілавікі разумеюць толькі сілу, але пакуль мы слабыя»

Тады ж затрымалі і шэраг іншых прадстаўнікоў няўрадавых арганізацый, але бальшыню пасьля ператрусаў, допытаў і папярэдняга ўтрыманьня адпусьцілі.

Паплечнікі Ўладзімера Мацкевіча стварылі і рэгулярна абнаўляюць старонку #Філёзаф_у_турме ў Facebook. Тым часам у менскім СІЗА №1 яго прызналі схільным да экстрэмізму.

ГЛЯДЗІЦЕ ТАКСАМА: «За філёзафа працуюць ягоныя ідэі». Як Уладзімер Мацкевіч сядзіць і ў турме, і ў фэйсбуку

Уладзімер Мацкевіч — філёзаф і мэтадоляг, грамадзкі дзеяч, тэлевядоўца. Заснавальнік і кіраўнік Агенцтва гуманітарных тэхналёгіяў, першы кіраўнік Рады Міжнароднага кансорцыюму «ЭўраБеларусь» (міжнародная грамадзкая арганізацыя, створаная прадстаўнікамі НДА ў 2007 годзе і зарэгістраваная ў Літве ў 2009 годзе), заснавальнік праграмы стварэньня «Лятучага ўнівэрсытэту».