Адзін з найбуйнейшых украінскіх аўтатрэйдэраў адмовіўся ад паставак тэхнікі зь Беларусі

Адначасова кампанія, якая была афіцыйным дылерам Менскага аўтамабільнага заводу, адмовілася і ад свайго судовага пазову да Міністэрства эканомікі Ўкраіны і Міжведамаснай камісіі ў пытаньнях міжнароднага гандлю ў сувязі з увядзеньнем мыта ў памеры 35 адсоткаў на пастаўку пасажырскага, грузавога і сельскагаспадарчага транспарту зь Беларусі.

Сёлета ў ліпені кампанія «Автоінвестстрой-Брок» падтрымала пазоў украінскага прадпрыемства з замежнымі інвэстыцыямі «Гандлёвы дом „МАЗ-Украіна“» з патрабаваньнем прызнаць супрацьпраўным рашэньне аб увядзеньні мыта і скасаваць адпаведнае рашэньне міжведамаснай камісіі.

Адмову ад судовага пазову да Міністэрства эканомікі Ўкраіны і Міжведамаснай камісіі ў пытаньнях міжнароднага гандлю кампанія патлумачыла тым, што «ў далейшым ня мае намеру імпартаваць зь Беларусі колавыя транспартныя сродкі».

Кампанія «Автоінвестстрой-Брок» уваходзіць у склад групы кампаній «АіС», якую ва Ўкраіне зьвязвалі з колішнім дэпутатам ад Партыі рэгіёнаў Дзьмітрыем Сьвяташам. «АіС» кантралюе больш за 12% аўтамабільнага рынку Ўкраіны і лідзіруе ў большасьці рынкавых сэгмэнтаў.

Адметна, што сярод уласьнікаў кампаніі «Автоінвестстрой-Брок» фігуруе тая ж кіпрская кампанія, што і ў выпадку з прыватнай кампаніяй «Укравтоторг», празь якую кіеўскія гарадзкія ўлады ў 2020 годзе набылі ў лізінг 200 аўтобусаў Менскага аўтамабільнага заводу.

Сёлета ў красавіку Міжведамасная камісія Ўкраіны ў пытаньнях міжнароднага гандлю ўвяла абмежаваньні на пастаўку зь Беларусі грузавога, будаўнічага, пасажырскага і спэцыяльнага аўтамабільнага транспарту. У прыватнасьці, на ўвоз гэтай прадукцыі ўвялі мыта ў памеры 35 адсоткаў ад мытнай вартасьці пастаўкі. Раней большасьць відаў гэтага транспарту пастаўлялася ва Ўкраіну ўвогуле бяз мыта.

Аднак у траўні Акруговы адміністрацыйны суд Кіева на пазоў украінскага прадпрыемства з замежнымі інвэстыцыямі «Гандлёвы дом „МАЗ-Украіна“» спыніў дзеяньне рашэньня Міжведамаснай камісіі Ўкраіны ў пытаньнях міжнароднага гандлю аб увядзеньні мыта на ўвоз беларускай аўтамабільнай тэхнікі. Да канца разгляду справы ў судзе гэтыя абмежаваньні прымяняцца ня будуць.