Зь Беларусі ў Польшчу працягваюць пранікаць мігранты, парушаючы дзяржаўную мяжу суседняй краіны. За мінулыя суткі польская памежная варта не дапусьціла паходу ўглыб краіны адразу 324 чалавек.
За спрыяньне нелегальнай міграцыі польскія памежнікі затрымалі дваіх чалавек — грамадзянаў Узбэкістану і Грузіі.
Рэкордны паказьнік на мяжы зафіксавалі неўзабаве пасьля таго, як прэм’ер-міністар Польшчы Матэвуш Маравецкі сказаў, што «ў Беларусі больш за 10 тысяч, а можа і больш асобаў, якія перамешчаныя з Блізкага Ўсходу, пераважна — з Іраку, а таксама з Сырыі, каб праводзіць гібрыдную атаку». Ён упэўнены, што Лукашэнка дзейнічае не самастойна, а з ухваленьня Масквы.
Польшча, Літва, Латвія ў апошнія месяцы ўзмацнілі ахову сваіх межаў зь Беларусьсю, на такія захады пайшла і Эстонія, дзе асьцерагаюцца, што ў краіну незаконна трапяць нелегалы зь Літвы і Латвіі, якія прыйшлі празь Беларусь. Урады гэтых краінаў раней наўпрост абвінавацілі Лукашэнку ў наўмысным стварэньні міграцыйнага ціску на Эўразьвяз.
17 верасьня высьветлілася, што Польшча ня будзе прымаць прашэньні аб прытулку ў парушальнікаў мяжы і забароніць ім уезд у Шэнген, гэтак вырашыў Сэйм краіны большасьцю галасоў.
ГЛЯДЗІЦЕ ТАКСАМА: Польшча ня будзе прымаць прашэньні аб прытулку ў парушальнікаў мяжы і забароніць ім уезд у Шэнген ГЛЯДЗІЦЕ ТАКСАМА: Прэм’ер Польшчы: Правакацыя зь мігрантамі была інсьпіраваная ў Маскве