Падкантрольны Расеі Кіеўскі раённы суд Сімфэропалю арыштаваў да 4 лістапада вядомага крымскататарскага палітыка, выкладчыка, палітоляга і журналіста Нарымана Джэляла.
Пра гэта паведамілі «Крым.Реалии» са спасылкай на грамадзкае аб’яднаньне «Крымская салідарнасьць». Джэляла затрымалі 4 верасьня ў сяле Першамайскае ў анэксаваным Расеяй Крыме.
Нарыман Джэлял — вядомы крымскататарскі палітык, выкладчык, палітоляг і журналіст. Намесьнік старшыні Мэджлісу крымскататарскага народу з 2013 году і да забароны дзейнасьці Мэджлісу пасьля анэксіі Крыму Расеяй, былы кіраўнік яго інфармацыйна-аналітычнага падразьдзяленьня.
У сакавіку 2014 году Расея анэксавала ўкраінскі паўвостраў Крым. Міжнародныя арганізацыі прызналі анэксію Крыму незаконнай і асудзілі дзеяньні Расеі. Краіны Захаду ўвялі супраць яе эканамічныя санкцыі. Крэмль называе анэксію паўвострава «аднаўленьнем гістарычнай справядлівасьці».