Арышты і ператрусы 11 жніўня: вобшук у экс-амбасадара Ляшчэні, затрыманьні дэлегатаў «Сходу»

Затрымалі адказнага сакратара БХД Дзяніса Садоўскага

Пра гэта паведаміла ў фэйсбуку ягоная жонка Тацяна Ўсіновіч.

«Сёньня раніцай інтэлігентныя людзі падышлі да Дзяніса Садоўскага, суправадзілі яго разам з дачкой да лякарні на аналізы і назад. Сувязь зь ім зьнікла. Віялета паднялася дадому адна, машына стаіць каля дома», — напісала Тацяна Ўсіновіч.

Празь некалькі гадзін яна паведаміла, што ў іх кватэры адбыўся вобшук, Дзяніс Садоўскі ўжо дома пад падпіскай аб неразгалошваньні.

Дзяніс Садоўскі, архіўнае фота

У Менску затрымалі таксама

• Аляксея Адамовіча,
• Вольгу Казановіч,
• Ульяну Калуцкіх,
• Паўла Якуту.

Аляксей Адамовіч — трэнэр і трыятляніст. Па яго прыйшлі на працу і павезьлі яго дадому на вобшук, які праводзіўся ў крымінальнай справе за арганізацыю ці актыўны ўдзел у беспарадках (арт. 342 КК), паведаміў «Белсат». Мінулым разам яго затрымалі 27 сьнежня, калі ён вяртаўся з трэніроўкі, і арыштавалі на 10 содняў за ўдзел у несанкцыянаванай акцыі (23.34 КаАП). Праз гэта ён страціў працу настаўніка фізкультуры ў школе. Аляксей з жонкай гадуюць двух непаўналетніх сыноў.

Паводле «Белсату»​, затрыманьне Дзяніса Садоўскага, імаверна, зьвязанае з тым, што ён быў прадстаўніком плятформы «Сход», як і іншыя затрыманыя.

Ператрус у амбасадара Ляшчэні і іншых дэлегатаў «Сходу»

Як паведамляюць праваабаронцы «Вясны», сапраўды адбываецца «зачыстка» дэлегатаў плятформы «Сход». У СМІ паведамляецца пра затрыманьні і ператрусы сама менш у пяці чалавек.

Паведамляецца пра ператрус у былога амбасадара Беларусі ў Славаччыне Ігара Ляшчэні. Пасьля выбараў ён асудзіў гвалт і пакінуў пасаду. Ляшчэня — адзін з дэлегатаў плятформы «Сход».

Як паведаміла @euroradio, сілавікі прыйшлі зь ператрусам да былога амбасадара Беларусі ў Славаччыне Ігара Ляшчэні. Журналісты @euroradio спрабуюць зьвязацца зь ім, але ён не выходзіць на сувязь. Ня выключана, што ператрус зьвязаны зь дзейнасьцю Ляшчэні на плятформе «Сход», дзе ён быў першым старшынём.

З 55 дэлегатаў у Менску пра факты перасьледу правааабаронцам сёньня вядома ў адносінах паловы зь іх.

Ператрусы прайшлі ў

1. Алены Радаман,
2. Юрыя Пісарчука,
3. Уладзіміра Каралёва,
4. Уладзімера Мельніка (вызвалілі пасля допыту),
5. Аляксея Багушэвіча,
6. Максіма Жукава (вызвалілі пасля допыту),
7. Івана Бялецкага,
8. Ігара Ляшчэні (былы амбасадар Беларусі ў Славакіі),
9. Алены Патаповіч,
10. Паўла Якуты,
11. Вольгі Казановіч,
12. Аляксея Адамовіча (выпусцілі пасля допыту ў КДБ),
13. Аляксея Плавінскага (вызвалілі пасля допыту),
14. Сяргея Ванінскага (вызвалілі пасля допыту),
15. Аляксея Дзеравягі (вызвалілі пасля допыту),
16. Натальлі Абрашына-Жадаевай (вызвалілі пасля допыту),
17. Радзіслава Фяцісава (вызвалілі пасля допыту),
18. Дзяніса Садоўскага (вызвалілі пасля допыту з падпіскай аб неразгалошванні),
19. Васіля Лапаціна (вызвалілі пасля допыту),
20. Аляксандра Малашыва,
21. Ігара Новіка (Нясьвіж, вызвалілі),
22. Мікалай Стрэха (верагодна, затрыманы, яго тг-канал захоплены).

На сувязь не выходзяць Алексей Блажэвіч, Яўген Пратасеня. Міліцыянты таксама тэлефанавалі Максіму Лімонаву, Паўлу Самусеву.

Таксама затрымалі трэнэра па трыятлёне Аляксея Адамовіча, які ў сьнежні 2020 году адбыў адміністрацыйны арышт.

Ператрусы у дамах анархістаў

Раніцай сілавікі прыйшлі зь ператрусамі па месцы рэгістрацыі прынамсі да васьмі актывістаў і актывістак анархісцкага руху ў Менску, Кобрыні, Гомлі, Горадні і іншых гарадах. Сама меней траіх затрымалі. Некаторыя з актывістаў ужо выехалі за мяжу, але ў іхных бацькоў і блізкіх пытаюцца, дзе яны, як зь імі зьвязацца, выклікаюць на гутаркі на працы.

Дома ў журналіста і актывіста Аляксандра Вялітчанкі прайшоў ператрус у крымінальнай справе

Праваабаронцам «Вясны» стала вядома, што раніцай супрацоўнікі ГУБАЗіК па Гомельскай вобласьці прыходзілі па месцы прапіскі журналіста-фрылансэра і актывіста Аляксандра Вялітчанкі.

Аднак дома нікога не засталі. Тады да маці Аляксандра, якая цяпер у працоўным адпачынку, патэлефанавалі з працы і тэрмінова выклікалі яе на размову да ідэоляга прадпрыемства.

Калі жанчына прыйшла на працу, там яе сустрэлі два супрацоўнікі, пасьля чаго адвезьлі дадому і правялі вобшук. У паперы на правядзеньне ператрусу значылася ня менш як пяць артыкулаў Крымінальнага кодэксу. У выніку ператрусу забралі адзін стары ноўтбук.

Таксама міліцыянты цікавіліся, дзе Аляксандар Вялітчанка, сказалі маці, што ён пададзены ў крымінальны вышук.

Напрыканцы ёй далі на подпіс паперу, у якой значылася, што супрацоўнікі паводзілі сябе карэктна і дзейнічалі ў межах закону.

Летась у кастрычніку Аляксандра Вялітчанку арыштавалі на 10 дзён, абвінаваціўшы ва ўдзеле ў акцыі пратэсту, якая праходзіла 23 жніўня. Вялітчанка тады віны не прызнаў і заявіў, што працаваў на акцыі журналістам — здымаў падзеі на фота і відэа.

Затрыманага за сьцяг пэнсіянэра забрала «хуткая»

Магілёўскага пэнсіянэра Івана Клішкова, затрыманага напярэдадні за бел-чырвона-белы сьцяг на сьцяне балькона, уначы з ізалятара забрала хуткая дапамога. Паводле папярэдняй інфармацыі, прычынай стаў гіпэртанічны крыз. У Івана Клішкова інваліднасьць 3-й групы, паведаміла «Вясна».

Ператрус у актывісткі ТБМ

Паводле праваабаронцаў, праходзіць ператрус у сябра магілёўскай арганізацыі ТБМ Валянціны Краско. Прычыны невядомыя. Пра гэта паведаміла ў Facebook яе сяброўка.

Супрацоўніка «Нафтану» арыштавалі за БЧБ-налепку на бампэры

36-гадовага рабочага «Нафтану» Сяргея Хвасьцянка затрымалі 9 жніўня ў Менску каля ўнівэрсама «Цэнтральны» на праспэкце Незалежнасьці. У Сяргея зламалася машына, і ён спыніўся на дарозе. Пабачыўшы гэта, да яго пад’ехалі супрацоўнікі ДАІ і прапанавалі дапамогу. Але на бампэры супрацоўнікі заўважылі бел-чырвона-белую налепку, якая, па словах Сяргея, залеплівала дзірку цягам пяці гадоў, паведамляе тэлеграм-канал «„Вясна“ назірае».

Замест дапамогі Сяргея Хвасьцянка адвезьлі ў Цэнтральны РУУС, дзе склалі пратакол па арт. 24.23 КаАП.

Справу Хвасьцянка 10 жніўня разглядаў судзьдзя Цэнтральнага суду Дзьмітры Карсюк. Сьведка-міліцыянт расказаў, што затрымліваў Сяргея разам з супрацоўнікамі АМАПу. Ён сьцьвярджаў, што Хвасьцянок адразу заявіў, што такім чынам выказвае свае палітычныя погляды. Сам мужчына назваў паказаньні міліцыянта няпраўдай.

Карсюк прысудзіў работніку «Нафтану» 15 дзён арышту.