Прэзыдэнт Украіны Ўладзімір Зяленскі даў інтэрвію амэрыканскаму інтэрнэт-парталу Axios, у якім выказаў расчараваньне адменай санкцыяў супраць «Паўночнага патоку – 2» і чарговы раз заклікаў паскорыць працэс уступленьня Ўкраіны ў NATO.
Адказваючы на пытаньне аб сваёй рэакцыі на заяву прэзыдэнта ЗША Байдэна пра тое, што адміністрацыя прыняла рашэньне ня ўводзіць новых санкцый супраць газаправоду «Паўночны паток – 2», Зяленскі адзначыў, што яго адміністрацыя «вельмі зьдзіўленая». Ён назваў расейскі газаправод «сапраўднай зброяй».
ГЛЯДЗІЦЕ ТАКСАМА: Бэрлін: ЗША ня будуць рабіць больш жорсткімі санкцыі супраць «Паўночнага патоку»«Гэта зброя ў руках Расейскай Фэдэрацыі, і мне не зусім ясна і нечакана, што патроны для гэтай зброі мусіць падносіць такая вялікая краіна, як ЗША», — сказаў ён.
Прэзыдэнт Украіны дадаў, што пра рашэньне ЗША адмяніць санкцыі ён даведаўся з прэсы. Аднак ён дадаў, што разумее важнасьць адносін ЗША зь Нямеччынай, якая зацікаўленая ў запуску «Паўночнага патоку – 2».
ГЛЯДЗІЦЕ ТАКСАМА: Белы дом: саміт Байдэна і Пуціна — гэта не ўзнагарода Расеі, а абарона інтарэсаў АмэрыкіПаводле вэрсіі парталу, Зяленскі быў зьдзіўлены і расчараваны гэтым рашэньнем і «моліць» Байдэна сустрэцца зь ім перад самітам кіраўніка Белага дому з прэзыдэнтам Расеі Ўладзімірам Пуціным 16 чэрвеня. Паводле прэзыдэнта Ўкраіны, ён гатовы пагаварыць з амэрыканскім лідэрам «у любы момант і ў любым пункце плянэты», цытуе Уладзіміра Зяленскага Axios.
Уступленьне Ўкраіны ў NATO: «Пытаньне мусіць быць вырашана неадкладна»
Камэнтуючы працэс інтэграцыі Украіны ў NATO, Зяленскі заявіў, што з прычыны затрымкі «шмат украінцаў паступова страчвае веру» ў прыняцьце краіны ў альянс.
«Я думаю, што гэта вялікая праблема. Гэта першае. Па-другое, я думаю, што калі нас чакаюць у NATO, калі яны сапраўды хочуць бачыць нас сярод удзельнікаў, то няма сэнсу зазіраць у бінокль у нейкую далёкую будучыню і абмяркоўваць гэтую будучыню. Пытаньне мусіць быць вырашана неадкладна. Цяпер нам пагражае небясьпека, наша незалежнасьць пастаўленая на карту, і нам цяпер патрэбна дапамога. Плян дзеяньняў у прыняцьці ў NATO стане сапраўдным сыгналам», — сказаў Зяленскі.
ГЛЯДЗІЦЕ ТАКСАМА: Украіна выказала зьдзіўленьне ў сувязі з адсутнасьцю запрашэньня на саміт NATOУ заключэньне ён адзначыў, што сытуацыя вакол «Паўночнага патоку-2» і прыняцьця ў NATO паказвае, што «Ўкраіна павінна разьлічваць ня толькі на сваіх партнэраў, але і на сябе».
У траўні намесьніца прэм’ер-міністра Ўкраіны ў пытаньнях эўрапейскай і эўраатлянтычнай інтэграцыі Вольга Стэфанышына заявіла, што NATO наўрад ці прыме рашэньне аб пляне дзеяньняў па далучэньні для Украіны падчас чэрвеньскага саміту.